Cristiano Ronaldo Intrega Kamisola Númeru 7 Depois Tinan 23 Reprezenta Portugal
Cristiano Ronaldo. Foto: Google
(OCNEWS) – Cristiano Ronaldo, jogadór estrela futeból Portugal, iha loron 5 Novembru 2026, anúnsia ofisialmente nia despedida hosi Selekasaun Nasionál Portugal, depois de reprezenta nasaun ne'e durante tinan 23, ho rejistu 234 aparisaun no 146 golu internasionál. Desizaun ne'e marka finál hosi trajetória istórika ida iha futeból internasionál, ne'ebé hahú iha Agostu 2003 no husik legadu importante ba futeból Portugal.
Iha
mensajen despedida ne'ebé Ronaldo publika iha nia konta rede sosiál Instagram,
jogadór tinan 41 ne'e afirma katak tempu atu entrega camisola númeru 7 ba
jerasaun tuirmai to'o ona.
Nia esplika
katak durante tinan 23, nia simu responsabilidade atu hatais, defende no lori
camisola ne'e ba estádiu sira iha mundu tomak.
“Desizaun
ne'e la fasil, tanbá iha desizaun balu ne'ebé la foti de’it ho ulun, maibé mós
ho laran,” Ronaldo afirma iha nia mensajen despedida.
Ronaldo mós
rekoñese katak nia trajetória ho seleksaun Portugal la'ós deit kona-ba jogu,
golu, rekordu no troféu, maibé mós kona-ba ema sira ne'ebé akompaña nia durante
kareira, inklui família, kolega ekipa, treinador no apoiadór sira.
Durante nia
períodu reprezenta Portugal, Ronaldo marka 146 golu iha 234 aparisaun, sai
jogadór ho rejistu golu no aparisaun internasionál mane ne'ebé aas liu iha
mundu.
Nia
kontribuisaun mós ajuda Portugal hetan títulu Campeonato Europeu iha 2016 no
Liga Nasaun iha 2019 no 2025.
Maibé,
anúnsiu despedida ne'e akontese depois Ronaldo hasoru problema disiplinár iha
seleksaun, tanbá nia sai hosi kampu preparasaun Portugal iha 30 Setembru 2026.
Akontesimentu
ne'e mai depois nia la hetan oportunidade atu tama iha jogu kontra Noruega,
ne'ebé Portugal manán ho rezultadu 2–1. Ronaldo afirma katak treinador Jorge
Jesus husu nia atu halo aquecimento durante minutu 30, maibé ikus mai la fó
oportunidade atu tama iha kampu.
Depois sai
hosi kampu preparasaun, Federasaun Futebol Portugal aplika suspensaun loron 30
no multa 255 euros ba Ronaldo, tanbá nia sai nem autorizasaun. Ronaldo depois
husu deskulpa no afirma katak nia kontinua prontu atu reprezenta nasaun.
Maski iha
kontrovérsia ne'e, Ronaldo la afirma diretamente iha nia mensajen despedida
katak desizaun atu sai hosi seleksaun kauza hosi konflitu ho treinador. Tanbá
ne'e, la iha baze atu konklui katak kontrovérsia disiplinár mak razaun úniku ba
nia despedida.
Iha sorin
seluk, Prezidente Federasaun Futebol Portugal, Pedro Proença, manifesta
apresiasaun ba kontribuisaun Ronaldo no konsidera nia hanesan lider no figura
importante iha istória seleksaun Portugal.
Treinador
Jorge Jesus mos afirma katak nia husu Ronaldo atu kontinua ho seleksaun, maibé
respeita desizaun pesoál ne'ebé jogadór ne'e foti.
Despedida
Ronaldo agora loke dalan ba jerasaun foun atu kontinua defende camisola
Portugal, enkuantu federasaun no ekipa téknika infrenta dezafiu atu hametin
lideransa no kontinuidade ekipa.
Maski nia
remata trajetória internasionál, Ronaldo sei kontinua nia kareira profisionál
iha nivel klube ho Al-Nassr, iha Arábia Saudita.
Nia sai hosi seleksaun la signifika katak nia kontribuisaun sei lakon hosi istória futeból Portugal. Ho rekordu, troféu no tinan 23 reprezenta nasaun, Cristiano Ronaldo husik legadu ida ne'ebé sei sai referénsia ba jerasaun futeból tuirmai.

Komentar
Posting Komentar