Burkina Faso Reforma Sistema Prizaun, Prizioneiru Partisipa iha Agrikultura no Serbisu Públiku
Oe-Cusse, 2 Novembru 2026 (OCNEWS) – Burkina Faso
kontinua reforma sistema justisa kriminál liuhosi implementasaun no hadi’ak
mekanizmu servisu ba interese públiku (Travail d’Intérêt Général – TIG),
ne'ebé permiti ema ne'ebé hetan kondenasaun partisipa iha atividade produtiva,
inklui agrikultura, servisu komunidade no projetu dezenvolvimentu públiku,
nu'udar alternativa ba pena prizaun iha kondisaun ne'ebé lei determina.
Reforma
ne'e iha objetivu atu hamenus númeru ema iha estabelesimentu prizaun, haforsa
reintegrasaun sosial ba ema ne'ebé hetan kondenasaun no aumenta kontribuisaun
sira ba dezenvolvimentu nasaun, inklui produsaun ai-han.
Governu
Burkina Faso hahú estabelese baze jurídika ba mekanizmu ne'e liuhosi Lei N.º
035-2024/ALT, ne'ebé aprova iha 8 Novembru 2024, kona-ba administrasaun servisu
ba interese públiku.
Iha 14
Outubru 2026, Assembleia Legislativa do Povo (ALP) aprova unanimemente projetu
lei ne'ebé revé lei anterior, ho votu favorável hosi deputadu na'in 71.
Revizaun ne'e iha objetivu atu hadi'a implementasaun sistema TIG, aumenta
oportunidade ba reintegrasaun sosial no haforsa jestaun sistema prizaun.
Tuir
informasaun hosi parlamentu Burkina Faso, reforma ne'e mosu tanbá
implementasaun lei anterior hatudu limitasaun balu, inklui utilizasaun serbisu
interese públiku ne'ebé seidauk luan ba infrasaun ki'ik, no atividade sira
ne'ebé antes konsentra liu ba serbisu manual.
Entre
inovasaun importante iha projetu lei foun mak possibilidade aplika serbisu
interese públiku ba infrasaun balu ne'ebé konsidera menus grave, aumenta
atividade ne'ebé bele hala'o tuir kapasidade no kompeténsia ema ne'ebé hetan
kondenasaun, no estabelese mekanizmu permanente atu konverte pena prizaun ba
serbisu interese públiku.
Maski
nune'e, infrasaun kriminál no infrasaun ne'ebé iha ligasaun ho terrorizmu
esklui hosi aplikasaun mekanizmu TIG tuir informasaun parlamentu. Ba ema ne'ebé
halo prejuízu, reparasaun prejuízu ne'e no avaliasaun kona-ba risku ba
seguransa públika sai parte importante hosi kondisaun jurídika.
Redusaun
pena prizaun liuhosi servisu públiku
Iha
implementasaun programa serbisu interese públiku iha 2025, autoridade Burkina
Faso introdús mekanizmu ne'ebé permiti prizioneiru sira hetan redusaun pena
prizaun liuhosi serbisu ba interese públiku.
Iha projetu
HIMO-Ziniaré, ne'ebé anúnsiadu iha 31 Jullu 2025, autoridade sira informa katak
fulan ida serbisu bele kompensa ho redusaun fulan tolu hosi pena prizaun.
Programa
ne'e envolve prizioneiru liu 500 atu partisipa iha atividade públika iha
munisípiu 22. Serbisu sira inklui limpeza kanál drenajen naruk 150 km, hasai
lixu 1.500 metru kubiku, hamoos no prepara rai ho área 300 hektare, no kuda
ai-hun 10.000.
Ministériu
Infraestrutura no Ministériu Justisa Burkina Faso esplika katak programa ne'e
la'ós de'it atu kontribui ba dezenvolvimentu komunidade, maibé mós atu fó
oportunidade ba ema ne'ebé hetan kondenasaun aprende kultura serbisu,
dezenvolve abilidade no prepara-an atu fila fali ba sosiedade.
Importante
atu nota katak redusaun fulan tolu ba kada fulan ida serbisu ne'e refere ba
modalidade projetu HIMO-Ziniaré, no la'ós regra automátika ne'ebé aplika ba
prizioneiru hotu iha atividade hotu.
Sentru
Prizaun Agríkola Baporo aumenta produsaun ai-han
Iha setór
agrikultura, Sentru Prizaun Agríkola Baporo (Centre Pénitentiaire Agricole de
Baporo – CPAB), ne'ebé lokaliza iha provínsia Sanguié, sai ezemplu ida hosi
implementasaun atividade agríkola no pastorál iha ambiente prizaun.
Sentru ne'e
harii iha 1986, durante lideransa antigu Prezidente Thomas Sankara, no agora
sai fatin ida ba prizioneiru sira atu partisipa diretamente iha atividade
produsaun agríkola.
Tuir
informasaun ofisiál hosi Prezidénsia Burkina Faso, sentru Baporo konsege produz
ai-han hamutuk tonelada 240 durante 2025.
Ba tinan
2026, sentru ne'e iha planu atu kuda ai-han iha rai ho área liu hektare 300, ho
estimativa produsaun tonelada 782,5.
Iha 22
Abril 2026, Prezidente Burkina Faso, Ibrahim Traoré, vizita sentru ne'e no
haree diretamente atividade agríkola ne'ebé prizioneiru sira hala'o, inklui
to'os haree-midar ho área hektare 40 ne'ebé kuda durante tempu bailoron.
Durante
vizita ne'e, Ibrahim Traoré afirma katak sistema prizaun tenki respeita
dignidade úmana, maski ema ida hasoru kondenasaun kriminál. Nia mós defende
katak prizioneiru sira tenki hetan oportunidade atu serbisu, aprende profisaun
no prepara-an atu sai membru sosiedade ne'ebé kontribui ba nasaun.
Governu mós
informa katak iha sentru Baporo konstrusaun edifísiu foun ho andar rua, ho
kapasidade atu simu ema detidu na'in 500. Projetu ne'e iha orsamentu estimadu
CFA 500 millaun atu hadi'a kondisaun detensaun no kapasidade sentru.
Reintegrasaun
sosial no dezafiu sistema justisa
Reforma
sistema TIG iha Burkina Faso la limita de'it ba atividade agríkola, maibé mós
buka liga sentensa judisiál ho responsabilidade sosial no oportunidade ba ema
ne'ebé hetan kondenasaun atu dezenvolve kapasidade foun.
Tuir
informasaun hosi Assembleia Legislativa do Povo, to'o 31 Dezembru 2025, ema
ne'ebé hetan kondenasaun na'in 1.058 hetan ona komutasaun hosi pena prizaun ba
serbisu interese públiku.
Ema sira
ne'e partisipa iha atividade produsaun agríkola iha Baporo, projetu Faso Mêbo
no serbisu intensivu ba utilizasaun forsa traballu iha komunidade.
Governu
konsidera mekanizmu ne'e nu'udar dalan ida atu kombina ezekusaun sentensa ho
responsabilidade sosial, hamenus sofre populasaun iha prizaun no aumenta
kontribuisaun ne'ebé ema hetan kondenasaun ba dezenvolvimentu públiku.
Maski
nune'e, rezultadu produsaun hosi sentru Baporo la signifika katak sistema
prizaun nasionál hotu ona, independente iha ai-han. Dadus tonelada 240 refere
de'it ba produsaun sentru ne'e durante 2025, no meta tonelada 782,5 mak
estimativa ba 2026, la'ós rezultadu final ne'ebé konfirma ona.
Reforma
ne'e hatudu esforsu Burkina Faso atu buka modelu justisa ne'ebé la haree de'it
ba kastigu, maibé mós fó atensaun ba responsabilidade, formasaun profisionál,
produsaun no reintegrasaun sosial ba ema ne'ebé hetan kondenasaun.
Jornalista:
Abílio D’Santos
Fontes:
- Assembleia Legislativa do Povo – Reforma servisu interese públiku, 14 Outubru 2026.
- Governu Burkina Faso – Atividade agríkola iha Sentru
Prizaun Baporo, 22 Abril 2026.
- Burkina24 – Programa HIMO-Ziniaré no redusaun pena
prizaun, 31 Jullu 2025.
- Lei N.º 035-2024/ALT – Dokumentu jurídiku ofisiál.

Komentar
Posting Komentar