RAEOA Prevé US$100 Mil ba Komemorasaun 28 Novembru, US$38 Mil Aprova Ona

Prezidente Autoridade Rejiaun Administrativa Espesiál Oe-Cusse Ambeno (RAEOA), Régio Serventes Roméia da Cruz Salu. Foto: OCNEWS/ Abilio da Cruz Quefi.

Oe-Cusse-Pante Macassar, 1 Novembru 2026 (OCNEWS) – Autoridade Rejiaun Administrativa Espesiál Oe-Cusse Ambeno (RAEOA) aprova ona orsamentu inisiál US$38.000 hodi suporta realizasaun serimónia komemorasaun Loron Proklamasaun 28 Novembru 2026, ne'ebé sei realiza iha Sub-rejiaun Pasabe, RAEOA.

Prezidente Autoridade RAEOA, Régio Serventes Roméia da Cruz Salu, afirma katak montante ne'e mak alokasaun inisiál husi parte administrasaun. Maibé, kalkulasaun orsamentu ba komemorasaun ne'e bele aumenta to'o US$100.000, bainhira inklui utilizasaun orsamentu husi setór estratéjiku sira seluk.

Iha preparasaun ba eventu ne'e, Prezidente Autoridade RAEOA mós hateten katak administrasaun sei halo koordenasaun ho setór privadu sira atu aselera preparasaun ba fatin ne'ebé sei uza ba realizasaun serimónia 28 Novembru iha Pasabe.

Régio esplika katak sistema alokasaun orsamentu ba komemorasaun tinan ida-ne'e sei bazeia ba nível kompeténsia Prezidente Autoridade no utilizasaun orsamentu anual husi administrasaun no setór relevante sira. Nia hateten katak sistema ida-ne'e diferente husi tinan sira uluk, bainhira prosesu hein aprovasaun bele lori ba despeza ne'ebé boot.

Tuir nia esplikasaun, iha etapa inisiál, parte administrasaun aprova ona orsamentu US$38.000. Maibé, bainhira kontabiliza mós utilizasaun orsamentu husi setór estratéjiku sira seluk, hanesan Institutu Jestaun Ekipamentu (IGE) no Saneamentu, montante totál ba komemorasaun bele to'o US$100.000.

“Agora Administrasaun sira nia alokasaun tinan-tinan ba Loron Serimónia Nasionál, foin dadauk hau aprova 38 mil husi parte administrasaun,” Régio dehan.

Nia kontinua esplika katak orsamentu husi setór seluk, inklui IGE no Saneamentu, sei haree no deklaradu tuir utilizasaun orsamentu kada setór, atu determina kalkulasaun totál ba komemorasaun 28 Novembru tinan ida-ne'e.

Aleinde suporta realizasaun serimónia, Prezidente Autoridade RAEOA mós hateten katak orsamentu ne'ebé sei utiliza ba eventu ne'e sei kontribui ba hadi'a infraestrutura públika iha Sub-rejiaun Pasabe.

Nia temi katak utilizasaun orsamentu sei inklui hadi'a kampu, fatin ba feira no reabilitasaun fasilidade públika sira, nu'udar parte husi esforsu atu transforma Pasabe.

Ho alokasaun orsamentu inisiál US$38.000 no estimativa totál ne'ebé bele to'o US$100.000, preparasaun ba komemorasaun Loron Proklamasaun 28 Novembru 2026 sei liga mós ho planu hadi'a infraestrutura públika iha Sub-rejiaun Pasabe.


Jornalista: Abilio da Cruz Quefi

Editor: Abílio D’Santos

 

Komentar

Postingan populer dari blog ini

𝗦𝗮𝗹𝗮𝗿𝗶𝘂 𝗙𝘂𝗻𝘀𝗶𝗼𝗻𝗮𝗿𝗶𝘂 𝗥𝗔𝗘𝗢𝗔 𝗔𝘁𝗿𝗮𝘇𝘂, 𝗚𝗼𝘃𝗲𝗿𝗻𝘂 𝗦𝗲𝗻𝘁𝗿𝗮𝗹 𝗙𝗼 𝗢𝗽𝘀𝗮𝘂𝗻 𝗧𝗼𝗹𝘂

𝐑𝐞𝐤𝐫𝐮𝐭𝐚𝐦𝐞𝐧𝐭𝐮 𝐋𝐚 𝐁𝐚𝐳𝐞𝐢𝐚 𝐁𝐚 𝐍𝐞𝐬𝐞𝐬𝐢𝐝𝐚𝐝𝐞, 𝐅𝐮𝐧𝐬𝐢𝐨𝐧𝐚𝐫𝐢𝐮 𝟏 𝐌𝐢𝐥𝐥 𝐑𝐞𝐬𝐢𝐧 𝐈𝐡𝐚 𝐀𝐦𝐞𝐚𝐬𝐚 𝐋𝐚𝐤𝐨𝐧 𝐒𝐞𝐫𝐛𝐢𝐬𝐮

Halerik Husi Merkadu Numbei: Ukun La Ho Domin, Produtu La Folin