Halerik Husi Merkadu Numbei: Ukun La Ho Domin, Produtu La Folin
![]() |
| Kordenador Jeral Merkadu Numbei, Orlando Colo. Foto: OCNEWS |
Oe-Kusi, 19 Outubru 2026 (OCNEWS), Negosiante no vendedór sira iha Merkadu Provizoriu Numbei, Rejiaun Administrativa Espesiál Oe-Kusi Ambeno (RAEOA), expresa sira-nia sentimentu triste no krítika boot kontra IX Governu neʼebé sira konsidera sai aat liután, tanbá husik sirkulasaun ekonomia lokál monu no neglijénsia ba fasilidade báziku hanesan bee-moos, eletrisidade, no fatin lixu iha merkadu neʼebé sai hanesan sentru komersiál ba suku 20.
Kordenador
jeral Merkadu Numbei Orlando Colo, ho lian triste no hatete katak, maske governu
troka malu kada tinan lima, situasaun iha IX Governu neʼe nian sai aat liután
no hamosu susar boot ba povu kbiit-laek sira tanba produ lokál la folin no ema
la sosa ona kompara ho governu sira iha tinan lima liu ba.
“IX
Governu neʼe sai at liután, tanba ami nia produtu iha merkadu la folin kompara
ho governu sira iha tinan 5 liu ba,ˮ hatete Orlando Colo ho lian triste.
Iha tinan sira liu ba vendedór sira loron ida bele hetan rendimentu toʼo
$20.00 ka $40.00, maibé situasaun ohin loron hamosu situasaun nakukun tanba
loron ida atu hetan deʼit $5.00 mós susar tebes, no dalaruma rendimentu loron
tomak tun toʼo $2.00 ka $1,50.00 deʼit.
“Iha
tinan sira liu ba, dalaruma loron ida ami bele hetan toʼo $40.00 no tun liu mak
$20.00. maibé haree fali ba situasaun atual, dalaruma loron ida hetan deʼit
$2.00 ka $1,50.00, atu hetan toʼo $5.00 neʼe difisil tebes,ˮ nia akresenta.
Triste
neʼe mós akresenta husi negosiante Marta Meni, neʼebé faʼan Buah ho Malus
durante tinan barak, neʼebé haktuir ho lian todan katak, iha tinan sira liu ba
nia konsege harii uma mutin ida ba nia familia husi meius neʼe, maibé ohin loron halo sira sente moruk no triste tebes tanba situasaun atual ka instabilidade governasaun iha RAEOA halo sira-nia produtu la folin iha merkadu.
![]() |
| Vendedór Merkadu Provizoriu Numbei, Marta Meni. Foto: OCNEWS |
Iha
sorin seluk preokupasaun husi vendedór sira sai todan liután tanba fasilidade
báziku iha merkadu provisóriu neʼe la hetan atensaun husi parte kompetente sira
no Prezidente Autoridade RAEOA neʼebé besik tinan ida la tau matan ba sira.
Tuir vendedór sira katak, merkadu provizoriu neʼe iha Hariis-fatin públiku hamutuk kuartu 6, no Bee ba hariis-fatin neʼe husi governu monta ona tanki-bee (fiber) 4 iha terenu, maibé daudaun neʼe Bee la iha tanba husi parte SAS ense Bee ba Fiber sira neʼe iha primeiru deʼit no maske hatama ona pedidu ba sira, maibé toʼo ohin loron seidauk hetan resposta no fiber sira kontinua maran.
“Foin
lalais neʼe, haʼu hatama pedidu ida ba iha SAS no iha pedidu neʼe ita husu atu
semana ida pelumenus ense dala-3 hanesan Segunda, Kuarta, no Sexta, maibé
seidauk hetan resposta no nunka mai ense Bee ba fiber sira neʼebé monta ona.
Merkadu neʼe kuaze besik atu tama ona ba tinan ida mós Prezidente Autoridade no
parte kompetente sira nunka fó atensaun ba preokupasaun iha merkadu provizoriu
neʼe rasik,ˮ haktuir Orlando.
Eletrisidade
neʼebé agora uza mós negosiante sira mak hola inisiativa organiza malu hodi
halo instalasaun tanba governu la hatudu atensaun no konsidera fatin neʼe
hanesan provizoriu deʼit.
![]() |
| Situasaun no kondisaun meza faʼan produtu lokal iha Merkadu Provizoriu Numbei, RAEOA. Foto: OCNEWS |
“Hanesan
vendedór, ami la fihir ba sé mak atu ukun. Sé deʼit mak povu fó konfiansa ba
nia atu ba ukun, importante tenke ukun ho responsabilidade, ukun ho domin,
nuneʼe osan bele sirkula atu ami-nia nia produtu mós bele folin iha merkadu,
atu bele atende nesesidade familia no suporta oan sira ba eskola,ˮ remata
Koordenador Jerál Merkadu Numbei.



Komentar
Posting Komentar