𝐑𝐞𝐤𝐫𝐮𝐭𝐚𝐦𝐞𝐧𝐭𝐮 𝐋𝐚 𝐁𝐚𝐳𝐞𝐢𝐚 𝐁𝐚 𝐍𝐞𝐬𝐞𝐬𝐢𝐝𝐚𝐝𝐞, 𝐅𝐮𝐧𝐬𝐢𝐨𝐧𝐚𝐫𝐢𝐮 𝟏 𝐌𝐢𝐥𝐥 𝐑𝐞𝐬𝐢𝐧 𝐈𝐡𝐚 𝐀𝐦𝐞𝐚𝐬𝐚 𝐋𝐚𝐤𝐨𝐧 𝐒𝐞𝐫𝐛𝐢𝐬𝐮
OE-CUSSE, 02 Outubru 2026 (OCNEWS)-Husi planu rekrutamentu ne'ebé sala no la bazeia ba nesesidade instituisaun, Autoridade RAEOA lori fali nia funsionáriu kontratadu no kazuais hamutuk 1 mill resin iha ameasa laran. Orsamentu ko'a 50℅ no Governu Sentral ameasa hapara funsionáriu sira tanba lideransa rejional falla iha jere Orsamentu Estadu.
Sekretáriu Rejional no Administrasaun Finansas RAEOA deklara katak, orsamentu ne'ebé ita ko'a to'o 50℅ hamosu krizi Saláriu ba funsionáriu Kontratadu no kazuais hamutuk 1 mill resin. Governu Sentral mak iha kompetensia, maibé se la iha environment posibilidade boot mak tenke hapara funsionáriu balun iha tempu besik molok hein Orsamentu Geral Estadu 2027.
Asuntu saláriu ba funsionáriu kontratadu no kazuais iha Rejiaun Administrativa Espesial Oe-Cusse Ambeno (RAEOA), daudaun iha faze krizi nia laran. Orsamentu ne'ebé menus no ko'a 50℅ husi Governu Sentral halo autoridade rejional labele selu ona saláriu funsionáriu sira nian ba fulan ne'e.
Sekretariu Rejional Administrasaun no Finansas, Sr. Salvador Da Cruz esplika katak, durante ne'e autoridade halo ona esforsu oioin inklui kria ekipa traballu ida atu reve fali funsionáriu Kontratadu sira-nia salariu ne'ebé la tuir tabela funsaun públiku, no hato'o ona asuntu ne'e ba Ministeriu Administrasaun Estatal no parte Ministeriu Finansas no Funsaun públika.
"Iha 2026, sira ko'a tiha 50℅ no falta 50℅. Husi 50℅ ne'e maka daudaun Prezidente Autoridade jere maibé osan nafatin la to'o. Tanba ida-ne'e maka ohin loron ita problema hela kona-ba funsionáriu kontratadu no kazuais sira ba fulan ida-ne'e labele simu saláriu," Deklara Sr. Salvador.
Nia subliña katak Prezidente Autoridade halo ona vizita ba nasional hodi hasoru komisaun sira no hato'o relatóriu kona-ba mekanizmu atu buka solusaun. Maski nune'e, últimu desizaun kona-ba environment depende husi Governu Sentral, tanbá RAEOA rasik la iha kompetensia atu foti desizaun kona-ba ida-ne'e.
"Posibilidade atu hapara funsionáriu balun, bainhira iha Násional la aseita ho ita-nia proposta environment atu atende problema ne'e. Karik to'o 2027 mak aprova orsamentu tuir total funsionáriu agora, hafoin ita akumula fali funsionáriu sira ne'ebé ita hapara," Nia hatutan
Bazeia ba dadus ne'ebé iha, total funsionáriu iha RAEOA hamutuk 2.400, ne'ebé kompostu husi funsionáriu permanente hamutuk mil ital no funsionáriu kontratadu 1 mil ital, inklui asesores no tékniku espesializadu hamutuk 33.
Iha sorin seluk, akadémiku DITKREO, Vicente Da Conceição Teme fó sai nia hanoin katak krize ne'ebé mosu daudaun ne'e mai husi fraku husi planu rekrutamentu.
Tuir nia, wainhira kada instituisaun halo rekrutamentu tenke bazeia ba nesesidade organizasaun nian, labele bazeia de'it ba nesesidade interpretasaun hodi hamosu fali impaktu todan ba orsamentu estadu nian.
"Bainhira ita halo rekrutamentu mak la haree ba nesesidade organizasaun, nia impaktu maka ikus ita tenke hasai funsionariu balun tanbá orsamentu la sufisiente. Se ita la tau importansia ba kapasidade finanseira, públiku sei kestiona nafatin," Vicente Da Conceição Teme akresenta
Tanba ne'e maka atu fó hanoin ba se de'it maka iha kompetensia atu halo rekrutamentu iha futuru, importante mak tenke haree ba nesesidade organizasaun refere, nune'e labele repete erru ne'ebé hanesan hodi lori impaktu negativu ba estabilidade serbisu no moris funsionáriu iha RAEOA.
Komentar
Posting Komentar