KRIA SERVISU KA HEIN SERVISU? IADE RAEOA ENKORAJA JOVEN SIRA HAHÚ NEGÓSIU

IADE Organiza Atividade Formasaun no Partilha Informasaun Kona-ba Vida Emprezariál, ba Estudante Sira Iha RAEOA. Foto: AmbenoNews 

Oe-Cusse, 10 Novembru 2026 (OCNEWS)-Institutu Apoiu ba Dezenvolvimentu Emprezariál (IADE) RAEOA, organiza atividade formasaun no partilha informasaun kona-ba vida emprezariál, ho objetivu atu motiva estudante sira prepara-an ba futuru ekonómia no kria oportunidade negósiu rasik.

Atividade neʼe halaʼo iha Salaun IADE RAEOA, ho partisipasaun masiva husi estudante universitáriu DIT-KREO RAEOA, UNPAZ RAEOA, Eskola Tékniku Vokasionál Palaban no Eskola Sekundária Katólika Oekusi.

Reprezentante Prezidente Autoridade RAEOA, Diretór Servisu Rejionál Edukasaun (SRE), Vincêncio Cono, hatoʼo motivasaun ba estudante sira atu la depende deʼit ba oportunidade servisu iha instituisaun públika, maibé prepara-an atu kria kampu servisu no dezenvolve negósiu rasik depois remata sira-nia estudu.

“Ohin haʼu subliña makaʼas para estudante sira bele iha seriedade departisipasaun, nuneʼe labele depende deʼit ba oportunidade servisu iha instituisaun públika. Depois remata estudu, sira bele hili atu kontinua ensinu superior ka organiza sira-nia an ba vida emprezariál, hodi kria oportunidade servisu ba sira-nia an rasik,” Vicêncio Cono hatoʼo.

Nia subliña katak vida emprezariál sai oportunidade importante ba jovem sira, maibé presiza formasaun, orientasaun no informasaun neʼebé kleʼan kona-ba programa no benefísiu sira neʼebé IADE disponibiliza.

Iha oportunidade hanesan, Diretór IADE RAEOA, Ermundo de Jesus Pereirra, esplika katak atividade neʼe nia objetivu mak atu partilla informasaun ba estudante sira kona-ba programa no servisu apoiu neʼebé IADE iha, nuneʼe sira bele halo desizaun independente kona-ba sira-nia futuru depois remata estudu iha nivel sekundáriu, tékniku vokasionál ka universitáriu.

Diretor Institutu Apoiu ba Dezenvolvimentu Emprezariál (IADE) RAEOA, Ermundo de Jesus Pereirra. Foto: AmbenoNews  
“Ami nia objetivu husi atividade neʼe mak atu fahe informasaun ba estudante sira kona-ba apoiu no servisu neʼebé IADE iha, atu bainhira sira remata estudu iha nivel sekundáriu, tékniku vokasionál ka universitáriu, sira bele iha koñesimentu atu hahú no dezenvolve sira-nia atividade emprezariál,” Ermundo de Jesus Pereirra deklara.

Ermundu observa katak estudante barak, liuliu sira neʼebé remata ona ensinu sekundáriu, tantu públiku no privadu, hasoru difikuldade atu kontinua estudu iha nivel superior. Tanba neʼe, empreendorizmu bele sai nuʼudar alternativa ida atu kria oportunidade ekonómia ba sira-nia an rasik, família no komunidade.

“Timor-Leste iha poténsia neʼebé boʼot, liuliu iha setór agrikultura. poténsia neʼe presiza dezenvolve, atu ita bele aumenta produsaun no sai kompetitiva ho nasaun viziñu,” hatutan Diretur IADE.

Kona-ba programa institusionál, Diretór IADE neʼe informa katak instituisaun neʼe iha ona programa formasaun no kapasitasaun emprezariál, liuhusi parseria ho instituisaun governamentál no organizasaun noun governamentál (ONG), hodi fó apoiu ba grupu emprezariál sira iha sub-rejiaun sira.

Nia revela katak, iha tinan kotuk IADE RAEOA fó ona apoiu ba emprezáriu lokál naʼin 4 (haat), liuhusi programa Fasilidade Inkubasaun Negósiu (FIN), atu dezenvolve sira-nia atividade emprezariál.

“Ba tinan kotuk, IADE RAEOA apoiua ona emprezáriu lokál naʼin haat liuhusi programa Fasilidade Inkubasaun Negósiu. Agora ami kontinua halo monitorizasaun no avaliasaun ba progresu implementasaun programa hirak-neʼe, atu haree dezenvolvimentu no rezultadu husi emprezáriu sira neʼebé simu apoiu,ˮ dehan Ermundu.

Nia hatutan katak, Rezultadu monitorizasaun no avaliasaun neʼe sei relata ba Prezidente Autoridade RAEOA, nuʼudar entidade neʼebé iha tutela direta ba programa hirak-neʼe, ho apoiu mós husi Gabinete Prezidente Autoridade RAEOA.

Ho atividade formasaun neʼe, IADE hein katak estudante sira bele komprende diʼak liután kona-ba oportunidade empreendorizmu, no la haree servisu governu hanesan dalan úniku ba sira-nia futuru, maibé mós konsidera kria negósiu rasik nuʼudar kontribuisaun ba dezenvolvimentu ekonomia lokal.


Jornalista  : Abilio da Cruz Quefi

Editor        : OCNEWS

Komentar

Postingan populer dari blog ini

𝗦𝗮𝗹𝗮𝗿𝗶𝘂 𝗙𝘂𝗻𝘀𝗶𝗼𝗻𝗮𝗿𝗶𝘂 𝗥𝗔𝗘𝗢𝗔 𝗔𝘁𝗿𝗮𝘇𝘂, 𝗚𝗼𝘃𝗲𝗿𝗻𝘂 𝗦𝗲𝗻𝘁𝗿𝗮𝗹 𝗙𝗼 𝗢𝗽𝘀𝗮𝘂𝗻 𝗧𝗼𝗹𝘂

𝐑𝐞𝐤𝐫𝐮𝐭𝐚𝐦𝐞𝐧𝐭𝐮 𝐋𝐚 𝐁𝐚𝐳𝐞𝐢𝐚 𝐁𝐚 𝐍𝐞𝐬𝐞𝐬𝐢𝐝𝐚𝐝𝐞, 𝐅𝐮𝐧𝐬𝐢𝐨𝐧𝐚𝐫𝐢𝐮 𝟏 𝐌𝐢𝐥𝐥 𝐑𝐞𝐬𝐢𝐧 𝐈𝐡𝐚 𝐀𝐦𝐞𝐚𝐬𝐚 𝐋𝐚𝐤𝐨𝐧 𝐒𝐞𝐫𝐛𝐢𝐬𝐮

Halerik Husi Merkadu Numbei: Ukun La Ho Domin, Produtu La Folin