APOIU POVU OE-CUSSE BA LERE, KANDIDATURA PREZIDENTE IHA DISKUSAUN
![]() |
| Povu Atoni Apoiu Jenerál Lere Anan Timur, Ba Kandidatura Prezidente Da Repúblika. Foto: OCNEWS |
Oe-Cusse, 10 Novembru
2026 (OCNEWS)-Partisipante sira iha diálogu
“Marka Diferensa 2027-2032” husu ba Jenerál Lere Anan Timur atu kandidata an ba
Prezidente da Repúblika, ho objetivu atu lidera nasaun no ajuda hatuur fila
fali Estatutu Rejime Espesiál Oe-Cusse. Hatan ba apelu ne’e, Lere deklara katak
nia prontu atu kandidata an se hetan konfiansa husi povu Oe-Cusse.
Apelu
ne’e hato’o durante diálogu ne’ebé hala’o iha Salaun Dominicana, Oe-Cusse, iha
loron Tersa, 10/11, ho tema “Marka Diferensa 2027-2032”.
Iha
diálogu ne’e, partisipante sira manifesta konfiansa ba Lere Anan Timur no husu
nia atu konsidera kandidatura ba Prezidente da Repúblika, hodi kontribui ba
lideransa nasionál no restaurasaun Estatutu Rejime Espesiál Oe-Cusse.
Partisipante
sira mós hateten katak, se Lere deside kandidata an, sira prontu atu mobiliza
apoiu populár ba nia kandidatura, ho esperansa atu hetan lideransa ne’ebé bele
lori nasaun ba futuru ne’ebé di’ak.
Hatan
ba preokupasaun partisipante sira nian, Lere afirma katak nia responsabilidade
no obrigasaun ba nasaun seidauk remata, no nia kontinua iha forsa atu kandidata
an ba Prezidente da Repúblika, ho kondisaun katak povu Oe-Cusse fó konfiansa ba
nia.
“Haʼu
nia dever obrigasaun seidauk hotu. Haʼu sei iha forsa, haʼu prontu atu
kandidata an ba Prezidente, naran katak imi Oe-Cusse fó imi nia konfiansa,” nia
deklara.
Lere
mós promete katak, se hetan konfiansa husi povu, nia sei servisu atu hatuur
fila fali Zona Espesiál Oe-Cusse.
Nia
esplika katak Estatutu Rejime Espesiál ne’ebé lakon akontese tanba desizaun
polítika, maibé ida-ne’e la signifika katak iha futuru Oe-Cusse labele hetan
fila fali estatutu ne’e.
Tuir
Lere, restaurasaun estatutu ne’e importante tanba Oe-Cusse no Atauro temi ona
iha Konstituisaun nu’udar zona espesiál, nune’e nia defende atu estatutu ne’e
bele hatuur fila fali.
Iha
diálogu ne’e mós, Jenerál Lere Anan Timur hato’o importánsia no
responsabilidade lideransa no administrasaun públika atu hala’o servisu ho
vizaun klaru, kolaborasaun no fó prioridade ba nesesidade populasaun iha
prosesu dezenvolvimentu RAEOA.
Nia
husu ba autoridade sira no lideransa hotu atu asegura servisu públiku hala’o
tuir objetivu dezenvolvimentu no interese komunidade nian.
Lere
konsidera katak dezenvolvimentu iha RAEOA tenke orienta ba nesesidade povu, atu
komunidade bele sente benefísiu husi programa no polítika públika sira.
Nia
mós enfatiza unidade identidade nasionál, hodi lembra katak Oe-Cusse oan sira
la’ós ema seluk, maibé Timoroan hanesan ho sidadaun sira iha munisípiu seluk.
“Lere
Oekusi oan ne’ebé ohin partisipa iha ne’e la’ós ema seluk, ema leet, ita mesak
Timor-oan, raan Timor, isin Timor, no klamar mós Timor, tanba ita hotu iha uma
lisan ida de’it mak Repúblika Demokrátika Timor-Leste,” nia deklara.
Nia
esplika katak Oe-Cusse iha situasaun jeográfika diferente husi munisípiu seluk,
tanba rejiaun ne’e iha fronteira ho nasaun seluk no lokaliza iha territóriu
Indonézia nia klaran.
Tuir
Lere, situasaun fronteira ne’e lori dezafiu espesífiku ba Oe-Cusse, ne’ebé la
hanesan ho munisípiu seluk.
Nia
mós temi kona-ba preokupasaun povu Oe-Cusse nian kona-ba lideransa rejionál,
ne’ebé antes povu Atoni sempre kestiona tanbasá ema husi munisípiu seluk mak
mai jere Oe-Cusse, enkuantu Oe-Cusse oan rasik mós iha kapasidade atu lidera.
Maibé,
ohin loron Oe-Cusse oan sira rasik hahú asume responsabilidade iha lideransa no
jestaun rejiaun nian. Nia konsidera desizaun ne’e importante atu Oe-Cusse oan
sira sente responsabilidade ba rai no komunidade rasik.
“Ukun
la’ós ukun ema seluk ka ema leet, maibé ukun o nia fetosan umane, ukun o nia
maun-alin, ukun o nia lisan no ukun o nia tradisaun,” nia afirma.
Nune’e,
Lere husu ba Oe-Cusse oan sira atu kontinua iha esperansa no hametin
estabilidade, tanba estabilidade mak fundamentu importante ba prosesu
dezenvolvimentu.
Iha
nia mensajen ikus, Lere lembra luta povu Timor-Leste nian ba ukun-rasik-an,
ne’ebé iha tempu uluk hamutuk defende liberdade Pátria.
Maibé,
tuir nia, iha tempu ukun-rasik-an, responsabilidade prinsipál mak kontinua
liberta povu husi kiak no mukit, atu povu bele hetan liberdade no moris ho
dignidade.
Nia
enfatiza katak ukun-rasik-an loloos la’os de’it hetan independénsia polítika,
maibé mós asegura katak povu rasik hetan benefísiu husi liberdade ne’e liuhusi
dezenvolvimentu no hadi’a kondisaun moris.
Jornalista : Abilio
da Cruz Quefi
Editor : OCNEWS

Komentar
Posting Komentar