EDTL OEKUSI ABANDONA ATENDIMENTU PULSA, KOMUNIDADE HUSU RESPONSABILIDADE
![]() |
| Komunidade Konsumidór Eletrisidade Hatoʼo Preokupasaun no Kritika ba Falta Atendimentu Iha Sentru Venda Pulsa Eletrisidade EDTL. Foto: OCNEWS |
Oe-Kusse, 12 Novembru 2026 (OCNEWS)-Komunidade konsumidór eletrisidade hatoʼo preokupasaun no kritika ba falta atendimentu iha sentru venda pulsa eletrisidade EDTL Padimau, neʼebé lokaliza iha aldeia Sanane, suku Costa, tanba funsionáriu sira la iha fatin servisu maski komunidade mai ho intensaun atu sosa pulsa ba nesesidade uma-kain.
Tuir
deklarasaun husi fonte konfirmadu neʼebé hetan entrevista husi OCNEWS iha
terenu, pontu atendimentu neʼe normalmente loke iha loron Sábadu no Domingu,
hahú hosi tuku 06:00 loraik toʼo tuku 10:00 kalan, inklui mos loron toleránsia.
Tanba neʼe, komunidade konsidera katak falta funsionáriu iha oras atendimentu
sai obstákulu ba sira-nia nesesidade loro-loron.
“Ami
mai iha neʼe lori osan atu sosa pulsa, laʼos mai husu buat gratuita. Ami
presiza tebes eletrisidade ba nesesidade uma-laran. Governu iha obrigasaun atu
atende povu nia nesesidade,” deklarasaun husi fonte konfirmadu.
Fonte
konfirmadu esplika katak, sira ba fatin atendimentu tanba hatene katak oras
tuku 06:00 loraik mak servisu atendimentu ba venda pulsa eletrisidade neʼe hahú.
Maibé, bainhira toʼo iha fatin, la hetan funsionáriu atu atende sira. Situasaun
toʼo obriga komunidade atu hein no lakon tempu.
Tanba
toʼo, komunidade husu ba entidade responsavel atu fó avizu antes bainhira
atendimentu la bele halaʼo, hodi evita konsumidór sira lakon tempu no osan atu ba
fatin neʼebé la iha servisu.
“Se
la iha ema atu atende, aviza antes atu nuneʼe ami bele prepara no sosa pulsa
sedu, la presiza mai hein kleur,” fonte konfirmadu hatoʼo.
Além
neʼe, fonte konfirmadu mós levanta kestaun kona-ba rekrutamentu no
responsabilidade funsionáriu sira iha prestasaun servisu públiku. Sira
konsidera katak maski Governu rekruta funsionáriu barak no aloka orsamentu ba
sira-nia salariu, atendimentu ba povu tenke kontinua sai prioridade.
fonte
konfirmadu mós hatoʼo informasaun katak sira rona alegasaun kona-ba funsionáriu
sira seidauk simu salariu. Keta ida-neʼe mak halo sira baruk atu tama servisu.
Iha
parte ikus, fonte konfirmadu husu ba Governu, liuliu Prezidente Autoridade RAEOA,
atu aumenta fiskalizasaun ba servisu EDTL, hodi garante katak funsionáriu sira
kumpre oras servisu no fó atendimentu tuir nesesidade komunidade hodi labele
halo povu terus nuneʼe.
Fonte
konfirmadu enfatiza katak, servisu eletrisidade nuʼudar servisu importante ba
moris loroloron, nuneʼe falta atendimentu la bele sai razaun neʼebé halo povu
terus bainhira sira iha osan no hakarak selu atu sosa pulsa.
Toʼo notísia neʼebé públika, OCNEWS seidauk hetan deklarasaun hosi responsavel EDTL kona-ba razaun falta funsionáriu iha oras atendimentu. Tanba neʼe, resposta hosi entidade kompetente sei importante atu klarifika problema neʼe no hatudu medida neʼebé sei foti atu mellora diʼak liután atendimentu ba konsumidór sira.
Jornalista : Abilio da Cruz Quefi
Editor : OCNEWS

Komentar
Posting Komentar