KOMEMORASAUN 12 NOVEMBRU BA DALA 35, LIDERANSA APELA JUVENTUDE PREPARA FUTURU NO HAMETIN PAZ
![]() |
| Komemorasaun loron nasionál 12 Novembru, Masakre Santa Cruz ba dala 35, iha Oe-Cusse Ambeno. Foto: RCAL |
Oe-Cusse, 12 Novembru
2026 (OCNEWS)-Komemorasaun loron nasionál 12
Novembru, Masakre Santa Cruz ba dala 35, iha Oe-Cusse Ambeno halaʼo ho apelu ba
juventude atu muda hahalok, hametin unidade nasionál no kontribui ba harii pás
no dame, hanesan baze ba dezenvolvimentu sustentável iha Timor-Leste.
Atividade
komemorasaun neʼe halaʼo iha Semitériu Santa Rosa, Aldeia Sanane, Suku Costa,
Sub-Rejiaun Pante Makasar, RAEOA, ho tema “Ho Espíritu Juventude 12 Novembru
Nian, Lori Ita Hamutuk ba Harii Pás no Autor ba Dezenvolvimentu Sustentável.”
Programa
komemorasaun hahú ho selebrasaun misa iha Parókia Numbei, no kontinua ho marsa
ba dame husi Parókia Numbei toʼo Semitériu Santa Rosa, antes halaʼo atividade
tau ai-funan hodi fó omenajen ba mártir no vítima sira Masakre Santa Cruz iha
12 Novembru 1991.
Prezidente
Komite 12 de Novembru, Domingos de Almeida, iha nia deklarasaun hatoʼo agradese
ba Maromak no Governu tanba apoiu ba realizasaun atividade komemorasaun neʼe.
![]() |
| Komemorasaun loron nasionál 12 Novembru, Masakre Santa Cruz ba dala 35, iha Oe-Cusse Ambeno. Foto: RCAL |
Domingos
enfatiza katak juventude tenke muda mentalidade husu beibeik saida mak estadu
atu halo, ba mentalidade atu sai sidadaun neʼebé iha kapasidade no
responsabilidade atu fó kontribuisaun ba nasaun.
“Labele
husu beibeik saida mak Estadu atu fó, maibé tenke prepara an atu sai ema neʼebé
bele fó kontribuisaun ba Estadu,” nia hatoʼo.
Nia
mós apela ba juventude atu hametin unidade nasionál, promove páz no dame, no
respeita malu hanesan sidadaun Timor-Leste. Nia observa katak partisipasaun
juventude iha serimónia komemorasaun tinan ida-neʼe seidauk toʼo nivel neʼebé espera,
maski nia respeita liberdade sidadaun atu hili atu partisipa ka lae iha sistema demokrásia.
Enkuantu,
reprezentante Prezidente Autoridade RAEOA, atual Sekretária Rejionál Asuntu
Sosiál no Organizasaun Komunitária, Merita Marques Lafo, hatoʼo mensajen ba
juventude atu aprende husi istória pasadu, respeita lideransa, no herói
nasionál sira neʼebé kontribui ba luta ukun-rasik-an.
![]() |
| Komemorasaun loron nasionál 12 Novembru, Masakre Santa Cruz ba dala 35, iha Oe-Cusse Ambeno. Foto: RCAL |
Merita
mós alerta kona-ba influénsia negativa husi mídia sosial neʼebé bele estraga
hanoin juventude no hamosu konflitu iha sosiedade. Tanba neʼe, nia husu ba
foin-saʼe sira atu uza mídia sosial ho responsabilidade no la tuir hahalok neʼebé
bele prejudika unidade no estabilidade nasaun.
Nia
subliña katak juventude tenke hatudu kapasidade liuhusi hahalok diʼak, hanoin
pozitivu no liafuan konstrutivu, hodi halo inan-aman no herói nasionál sira
sente orgullu.
Merita
mós fó énfase ba edukasaun no servisu hanesan prioridade ba jerasaun foun,
maski enfrenta difikuldade atu hetan oportunidade empregu.
“Juventude
tenke estuda, estuda no servisu, no halo buat diʼak. La bele buka estraga
situasaun seguransa no estabilidade neʼebé ita iha ona,” nia afirma.
Iha
parte seluk, Xefe Suku Costa, Francisco Colo, apela ba juventude atu komprende
didiʼak prinsipiu demokrásia no hatene katak liberdade tenke akompaña ho
konsiénsia, konsensu morál no responsabilidade.
Tuir
nia, Timor-Leste nuʼudar Estadu Direitu Demokrátiku, fó liberdade ba sidadaun
atu halaʼo sira-nia atividade, maibé sidadaun hotu presiza respeita malu no
konsidera direitu ema seluk.
Nia
hateten katak komemorasaun loron 12 de Novembru tenke sai momentu atu inspira
foin-saʼe sira husi istória Masakre Santa Cruz tinan 1991, hodi prepara an atu
harii futuru nasaun.
“Foin-
saʼe sira presiza estuda makaas, respeita malu no konsidera malu. Ho nuneʼe,
ita bele atinji páz no dame iha ita-nia moris, família no nasaun,” nia hatoʼo.
Francisco
Colo mós subliña katak Governu sei fó atensaun ba ema sira neʼebé iha hanoin no
vontade atu kontribui ba dezenvolvimentu nasaun.
Komemorasaun
ba dala 35 neʼe sai nuʼudar momentu atu hanoin fila-fali sakrifísiu juventude
no mártir sira iha Masakre Santa Cruz iha 12 Novembru 1991, no hametin
kompromisu jerasaun foun atu muda hahalok, valoriza istória, promove páz no
dame, no kontribui ba dezenvolvimentu sustentável iha Timor-Leste.
Jornalista : Abilio
da Cruz Quefi
Editor : OCNEWS



Komentar
Posting Komentar