Estrada Pasabe Sei La Remata Molok Eventu Nasionál? Diretor Obras Públikas Fó Rekomendasaun
Oe-Cusse, 8 Outubru 2026 (OCNEWS) — Maski hahú ona iha
tinan 2024, projetu reabilitasaun no alargamentu estrada husi Noel-Ekat,
Bobometo, Oe-Silo to’o Postu Administrativu Pasabe, to’o agora seidauk remata.
Situasaun ne’e sai preokupasaun ba lideransa suku no parte Igreja, tanbá atrazu
iha implementasaun projetu ne’e hamosu difikuldade ba populasaun ne’ebé uza
estrada refere.
Projetu alargamentu estrada husi Noel-Ekat to’o Pasabe
ne’e, ne’ebé empreza Timor Lorosa’e mak ezekuta, seidauk finaliza, nune’e mosu
reklamasaun husi komunidade kona-ba implementasaun obra ne’e.
Hodi responde ba preokupasaun hirak-ne’e, Diretór
Rejionál Infraestrutura Obras Públikas RAEOA, Remigio Nunu Sila, esplika katak
atrazu iha implementasaun projetu ne’e akontese tanbá governu hatuur ona
kondisaun no rekomendasaun balu ba empreza, atu garante katak obra ne’e hadi’a
no mellora tuir padraun tékniku estrada nian.
“Alende ne’e, bazeia mós ba deliberasaun ne’ebé ami halo
iha semana kotuk kona-ba eventu nasionál Proklamasaun Independénsia RDTL,
ne’ebé sei realiza iha loron 28 Novembru 2026 iha Postu Administrativu Pasabe.
Tanbá ne’e, husi Obras Públikas nia parte, ami foti kedas desizaun atu
rekomenda ba empreza atu aselera no hadi’a projetu refere, inklui mós servisu
drenajen,” nia hateten.
Remigio rekoñese katak iha dezafiu tékniku balu iha
implementasaun projetu ne’e. Maski obra ne’e envolve empreza rua, tuir nia
esplikasaun, empreza sira uza de’it ekipamentu husi kompaña ida, inklui
ekipamentu EDS. Kondisaun ne’e halo difisil ba empreza atu fahe no destaka
ekipamentu ba kada trosu estrada ne’ebé presiza servisu.
Maski hasoru dezafiu hirak-ne’e, Remigio hatutan katak
daudaun ne’e ekipa Obras Públikas sira foka hela servisu iha trosu estrada husi
área Hau-Ana, Suku Usitasae, to’o Tumin, Suku Bobometo.
Iha área hirak-ne’e, empreza sira hala’o servisu ateru
atu taka parte estrada ne’ebé kuak, hamós fatin obra no ke’e drenajen. Servisu
drenajen ne’e importante atu bainhira tempu udan, bee bele suli tuir nia dalan
no la estraga fali estrada, hanesan akontese ona iha tinan sira liubá.
Kona-ba aspetu tékniku, Diretór Rejionál Infraestrutura
ne’e klarifika katak trosu estrada Pasabe tama iha kategoria estrada rejionál.
Tanbá ne’e, estrada ne’e sei la uza superfície sementu, maibé sei uza
revestimentu asfáltiku (aspál) nu’udar estrada definitiva.
Nia mós hateten katak planu atu hadi’a estrada ne’e tama
ona iha narrativa Orsamentu Estadu 2027, no hein katak planu ne’e sei hetan
aprovasaun atu bele implementa ho kompletu iha tinan oin.
Maski nune’e, implementasaun projetu ne’e sei depende mós
ba polítika governu liuhusi Ministériu Obras Públikas. Ida-ne’e tanbá alokasaun
orsamentu ba projetu boot sira iha Rejiaun Administrativa Espesiál Oe-Cusse
Ambeno (RAEOA) agora daudaun jere liuhusi Fundu Espesiál Dezenvolvimentu (FED).
Kona-ba preokupasaun komunidade nian kona-ba orsamentu,
autoridade lokál sira husu atu reabilitasaun estrada iha faze atual ne’e tenke
hala’o ho kualidade no tuir padraun tékniku.
Husi Obras Públikas nia parte, autoridade ne’e esplika
katak maski projetu ne’e hahú iha tinan kotuk no seidauk finaliza, situasaun
ne’e la signifika katak sei iha alokasaun orsamentu dala rua ba projetu
hanesan. Orsamentu ne’e sei mantein ida de’it, maibé servisu ne’ebé seidauk
remata sei kontinua tuir padraun tékniku, bazeia ba inspesaun rigorozu iha
terenu.
Objetivu husi inspesaun ne’e atu garante katak obra
hala’o ho kualidade no osan públiku uza ho responsabilidade.
Reportagen: OCNEWS

Komentar
Posting Komentar