Inkompeténsia Administrasaun Prezidente Autoridade Fó Terus ba Funsionáriu Kontratadu: Promesa Foun Sei Labele Rezolve Lalais Saláriu Atrazadu iha RAEOA
Prezidente Autoridade RAEOA, Régio Serventes Roméia da Cruz Salu. Foto OCNEWS/ Abilio D. C. Quefi
Oe-Cusse-Pante Macassae, 27 Outubru 2026 (OCNEWS)-Faillansu grave iha planeamentu orsamentu no inkompeténsia boʼot husi
administrasaun foun ne’ebé lidera husi Prezidente Autoridade RAEOA, Régio
Serventes Roméia da Cruz Salu, kontinua foti funsionariu sira ho rendimentu
baixu liuliu funsionáriu kontratadu sira hodi sai fali vítima. Funsionáriu sira
ne’ebé kontribui ba dezenvolvimentu rejiaun nian tenke pasensia hodi subrevive
deʼit ho fuan-moruk tanbá la simu sira-nia saláriu vensimentu dezde fulan
Setembru liubá to’o ohin loron, maski problema ne’e dada naruk ona ho promesas
oioin ne’ebé la mai ho solusaun imediatu.
Krizi finanseira no administrativa ne’e hatudu momos fragilidade
lideransa nian, tanbá enkuantu funsionáriu permanente sira simu saláriu normál,
funsionáriu kontratadu sira mak tenke responsabiliza ba dezafiu no faillansu planeamentu husi autoridade.
Prezidente Autoridade RAEOA, Régio Salu, rekoñese katak pagamentu ba
saláriu funsionariu kontratadu ba fulan hirak ne’e nian atrazadu tanbá sei iha
prosesu reajustamentu finál ho Komisaun Funsaun Públika no Ministériu
Administrasaun Estatál (MAE).
Bazeia ba dadus ne’ebé identifika, krizi ne’e mosu tanbá alokasaun
orsamentu ba saláriu iha tinan 2026 ne’e menus no la bazeia ba kálkulu ne’ebé
realista. Iha livru Orsamentu Jerál Estadu 2026, alokasaun ba saláriu
vensimentu hamutuk millaun $8.2 de’it, ne’ebé orijinalmente prevee de’it ba
diretór na’in 13.
Deklarasaun ne’e hato’o ba Jornalista sira hafoin remata enkontru ho Autoridade Rejional sira tersa-feira ne’e 27/10 iha salaun konvensaun um de maio Palaban Suku Costa Postu Administrativa Pante Macassar.
Ironikamente, liutiha tomada de pose iha fulan Abríl 2026,
administrasaun foun ne’e mai ho desizaun hodi aumenta fali númeru diretór nian
ba na’in 24 liuhusi diploma ministeriál foun, maski sira hatene katak la iha
aumentu ba fundu saláriu vensimentu nian. Husi desizaun ne’e ikusmai tau
funsionáriu kontratadu sira iha situasaun difisil.
Rezultadu husi ekipa Task Force hatudu katak tuir loloos kada kontratadu
ida tenke hetan $450.00 USD, maibé tanbá osan la toʼo no la tuir tabela funsaun
públika no Dekretu-Lei Nú. 03 nian, maka hakarak ka lakohi tenke diminui.
Iha ninia esplikasaun ba jornalista sira, Prezidente Autoridade RAEOA,
Régio Serventes Roméia da Cruz Salu, rekoñese katak kestaun atrazu ne’e
akontese duni tanbá menus alokasaun, no nia hatoʼo deklarasaun hanesan tuir mai
ne’e:
“Prosesu Reajustamentu ba Salariu Vensimentu remata ona, no refleta hira
mak ita presiza, ne’e bazeia ba tabele funsaun Publika no Dekreitu lei Nu° 3
kona ba Nivel Salariu termu sertu. Orsamentu Alokasaun ba Salariu ba Tinan 2026
menus, tanbá maioria la tuir tabela Rua, no Maioria mak baixu tambá osan la
toʼo, nuneʼe ho Reajustamentu ne’e ekipa Task Force deteta katak loloos kada
kontratadu ida tenke hetan $ 450.00 USD, maibé defaktu, ida tun toʼo kraik. Ita
tenke halo sinkroniza tuir prosesu pagamentu saláriu ba funsionáriu kontratadu
sira ba fulan-Outubru liu tiha ona, maibé sei hetan pagamentu iha fulan oin.ˮ
Maski Komisaun Funsaun Públika no MAE konkorda ona ho rezultadu servisu
Task Force nian, funsionariu kontratadu sira tenke pasiénsia liután tanbá
saláriu ba fulan-Outubru nian mós konfirmadu tarde tan.
Régio Salu garante katak pagamentu ba saláriu sira ne’ebé atrazadu ne’e
iha posibilidade boot sei ezekuta fali iha fulan Novembru tinan ne’e, no
submete ona pedidu virement estruturál internu hamutuk millaun $1.9 hodi hein
aprovasaun finál husi Ministériu Finansas.
Lideransa RAEOA fó garantia katak, kestaun estruktural saláriu neʼe sei
la sai problema tan iha tinan oin, tanbá reajustamentu neʼe prevee ona iha
panorama orsamentu tinan 2027.
Jornalista: Abilio D. C. Quefi
Editor: Abílio D’Santos

Komentar
Posting Komentar