Papa Leão XIV Hetan Diagnóstiku Kankru Pulmão, Operasaun Remata Ho Susesu
Vatikanu, 14 Outubru 2026 (OCNEWS) – Papa Leão XIV hetan diagnóstiku adenokarsinoma pulmonár, tipu kankru ida ne’ebé afeta pulmão, depois ekipa médiku hala’o operasaun kirurgika atu hasai lóbulu inferiór husi nia pulmão loos, iha Ospitál Universitáriu Agostino Gemelli, Roma, Itália, iha Tersa (13/10).
Tuir boletin médiku ofisiál ne’ebé Holy See Press Office publika iha 13 Outubru 2026, ezame histolójiku ba tecidu ne’ebé ezamina durante operasaun konfirma diagnóstiku adenokarsinoma pulmonár, hanesan suspeita ona husi ezame médiku antes operasaun.
Operasaun ne’e hala’o ho téknika videoasistida no dura besik minutu 90. Papa Leão XIV hela iha sala operasaun durante besik oras tolu.
Ekipa kirurgia ne’e lidera husi Professor Stefano Margaritora, ne’ebé hetan apoiu husi doutór no membru ekipa médiku seluk. Tuir relatóriu ofisiál, operasaun remata ho susesu no laiha komplikasaun.Depois operasaun, Paus fila ho kondisaun normál. Depois períodu observasaun badak, nia transfere ba kuartu tratamentu iha andár sanulu ospitál nian.
Iha atualizasaun ne'ebé publika iha 14 Outubru 2026, Vatican News relata katak Papa Leão XIV liu kalan dahuluk iha Ospitál Gemelli, Roma, ho kalma. Depois operasaun, Papa husu atu han jantar no pasa kalan hamutuk ho nia sekretáriu sira no pesoál Vatikanu.
Relatóriu Associated Press (AP), ne'ebé publika iha 14 Outubru 2026, informa katak Papa Leão XIV hahú han, la'o iha kuartu ospitál nian no halo terapia respiratória durante períodu rekoperasaun. Ezame raan no radiografia tórax ne'ebé halo depois operasaun hatudu katak nia rekoperasaun la'o tuir esperadu, ho rezultadu ezame sira iha limite ne'ebé konsidera normál ba tipu operasaun ne'ebé hala'o.
Maski sinal
rekoperasaun inisiál sira ne'e favorável, ekipa médiku sei presiza avalia
rezultadu ezame adisionál atu komprende kle'an liu kona-ba kondisaun kankru
nian no nesesidade ba tratamentu tuirmai.
Adenokarsinoma pulmonár mak tipu kankru ida ne'ebé dezenvolve iha selula glandulár iha pulmão. Tuir informasaun ne'ebé disponivel to'o 14 Outubru 2026, seidauk iha informasaun ofisiál kona-ba nivel kankru Papa Leão XIV nian, inklui kankru ne'e hada'et ba gangliu linfátiku ka parte seluk iha isin. Vatikan mós seidauk fó sai desizaun kona-ba nesesidade ba tratamentu adisionál, hanesan kemoterapia ka tratamentu seluk, tanba sei hein rezultadu ezame adisionál.
Tanba ne’e, maski operasaun remata ho susesu no Papa Leão XIV hatudu sinal rekoperasaun inisiál ne’ebé pozitivu, ida-ne’e seidauk signifika katak nia kura ona husi kankru. Sei presiza hein rezultadu ezame médiku adisionál atu hatene ho klaru nivel kankru nian se nia presiza tratamentu tan.
Antes operasaun, Prefektura Uma Pontifikál anunsia katak audiénsia hotu-hotu Papa Leão XIV nian sei kansela to’o Tersa, 20 Outubru 2026, atu fó tempu ba nia atu simu tratamentu médiku no rekopera nia kondisaun.
Vatikanu antes ne’e mós informa katak períodu rekoperasaun pós-operasaun ne’ebé estima mak besik semana ida. Maski nune’e, tempu efetivu atu kontinua rekopera no sai husi ospitál sei depende ba evolusaun kondisaun saúde Papa Leão XIV nian no avaliasaun husi ekipa médiku.
OCNews sei kontinua akompaña no monitoriza informasaun ofisiál husi Vatikanu kona-ba kondisaun saúde Papa Leão XIV, no sei atualiza notísia tuir dadus foun ne’ebé verifikadu no konfirmadu husi fonte konfiável.
Jornalista: Abilio D'Santos
Fonte no Referénsia:
- Boletin médiku ofisiál Vatikanu, 13 Outubru 2026 — fonte prinsipál kona-ba operasaun, diagnóstiku no rezultadu imediatu. Lee boletin médiku ofisiál Vatikanu
- Vatican News, 14 Outubru 2026 — atualizasaun kona-ba kalan dahuluk Paus iha ospitál no rekoperasaun inisiál. Lee atualizasaun Vatican News
- Associated Press, 14 Outubru 2026 — informasaun kona-ba Paus hahú han, la'o, halo terapia respiratória no rezultadu ezame pós-operasaun. Lee relatóriu Associated Press

Komentar
Posting Komentar