Exporta Obralan Ba Indonesia, PNTL RAEOA Kaptura Suspeitu Na’in Lima
Oe-Cusse-Nitibe, 12 Outubru 2026 (OCNEWS) – Ekipa konjunta husi Polísia Nasionál Timor-Leste (PNTL), Unidade Patrollamentu Fronteira (UPF) no Serbisu Sekretu iha Rejiaun Administrativa Espesiál Oe-Cusse Ambeno (RAEOA) detein sidadaun na’in lima ne’ebé exporta sasán kontra-bandu, hanesan obralan hamutuk karon 100 liu husi dalan ilegal, iha Aldeia Manan, Suku Beneufe, Postu Administrativu Nitibe, ba Oepoli, Indonézia.
Suspeitu na’in lima ne’ebé polísia detein ne’e kompostu husi sidadaun estranjeiru na’in haat, hosi Indonézia, ho inisiál FA, JE, SM no AB, no sidadaun Timor-oan ida ho inisiál JC.
Komandante PNTL Rejionál Oe-Cusse Ambeno, Superintendente Xefe Nicolao Francelino da Costa, Segunda-feira ne’e informa katak operasaun ne’e hahú depois Eskuadra Nitibe simu informasaun iha loron 9 Outubru, por volta oras tuku 4 lokraik.
“Komandante Eskuadra Nitibe ho nia membru sira simu informasaun husi fontes balun katak iha sidadaun estranjeiru ne’ebé lori sasán kontra-bandu, hanesan obralan, hamutuk karon 100, ho intensaun atu lori sai husi dalan ilegal iha área teritoriál ita-nian, Citrana, Suku Beneufe, ba área Oepoli, Indonézia,” dehan Komandante Nicolao ba jornalista sira iha nia fatin servisu.
Hafoin simu informasaun ne’e, ekipu PNTL Eskuadra Nitibe desloka direta ba fatin akontesimentu no hala’o atuasaun. Durante operasaun ne’e, suspeitu balun konsege halai, maibé ekipa konjunta konsege kaptura sidadaun estranjeiru na’in haat no sidadaun Timor-oan na'in ida.
Hafoin ne’e, PNTL Eskuadra Nitibe halo kordenasaun ho UPF atu asegura sasán hirak ne’e nu’udar evidénsia.
To’o agora, Komandu Rejionál PNTL-RAEOA detein ona suspeitu na’in lima no kontinua halo identifikasaun atu kompleta prosesu legál antes entrega kazu ne’e ba Ministériu Públiku.
Komandante Nicolao haktuir katak sasán obralan hamutuk karon 100 ne’e entrega ona ba Ministériu Públiku atu hein prosesu tuir lei. Nia mós informa katak iha kordenasaun ho Xefe Investigasaun atu prepara ekipa ne’ebé sei foti desizaun kona-ba prosedimentu deportasaun ka entrega sidadaun estranjeiru sira ba parte Indonézia, tuir lei ne’ebé vigora.
Komandante Nicolao hato’o agradesimentu no apresiasaun ba Eskuadra Nitibe no komunidade sira ne’ebé fó apoiu liuhusi informasaun ne’ebé sira fó ho lalais iha terenu.
Atu hametin liután seguransa iha fronteira, Komandante PNTL RAEOA husu ba eskuadra no postu sira iha liña fronteira atu kontinua halo vigilánsia ho rigor.
“Tuir dadus ne’ebé ami simu, sasán hirak ne’e sidadaun estranjeiru sira lori tama mai iha área teritoriál ita-nian ho intensaun atu lori sai liuhosi dalan ilegál. Maibé sira la konsege ultrapasa fronteira, no ami konsege preende sasán hirak ne’e,” afirma Komandante Nicolao.
Nia apela atu kordenasaun entre PNTL no UPF kontinua metin, hodi prevene no evita tranzasaun sasán ilegál husi Timor-Leste ba Indonézia no husi Indonézia tama mai iha territóriu nasionál.
Reportagen: OCNEWS



Komentar
Posting Komentar