Oe-Cusse Prontu Exporta Masin: Hektár 10 Entrega Ona ba Kompaña

MinistériuKomérsiu no Indústria hamutuk ho Autoridade RAEOA, ofisialmente entrega ona projetu indústria masin ho luan hektár sanulu iha Maesmone ba kompaña Lijuramoxdaily Unipesoal.Lda, hodi halaʼo jestaun kontinuasaun no ekspansaun ba produsaun masin nasionál. Foto OCNEWS/ Abilio Da Cruz Quefi

Oe-Cusse-Pante Macassar, 27 Outubru 2026 (OCNEWS) - Ministériu Komérsiu no Indústria hamutuk ho Autoridade Rejiau Administrativa Espesiál Oe-Cusse Ambeno (RAEOA) ofisialmente entrega ona projetu indústria masin ho luan hektár sanulu iha Maesmone ba kompaña Lijuramoxdaily Unipesoal.Lda, hodi halaʼo jestaun kontinuasaun no ekspansaun ba produsaun masin nasionál.

Solenidade entrega termu no asinatura akordu neʼe halaʼo ho susesu iha edifísiu Gabinete Prezidente Autoridade RAEOA, Pante Makasar, hanesan pasu estratéjiku hodi transforma potensiál tasi-ibun Oe-Cusse nian ba merkadu internasionál.

Prezidente Autoridade RAEOA, Regio Servantes Roméia da Cruz Salu, afirma katak Ministériu Komérsiu no Indústria entrega projetu neʼe ba autoridade atu jere, no ohin asina kedas termu entrega hodi transfere fali ba kompaña neʼebé sei responsabiliza ba produsaun masin.

“Iha Dezembru 2026, sei halo lansa produtu masin neʼebé produz husi ita rasik sei fornese ba loja hotu iha Oe-Cusse,ˮ dehan Regio Servante Salu.

Alende aumenta área produsaun ba hektár 10, autoridade mós husu ba kompaña atu envolve komunidade sira neʼebé hela iha área tasi-ibun, liuliu iha fatin neʼebé la iha ai-parapa no tasi saʼe, hodi bele produz masin iha neʼebá.

MinistériuKomérsiu no Indústria hamutuk ho Autoridade RAEOA, ofisialmente entrega ona projetu indústria masin ho luan hektár sanulu iha Maesmone ba kompaña Lijuramoxdaily Unipesoal.Lda, hodi halaʼo jestaun kontinuasaun no ekspansaun ba produsaun masin nasionál. Foto OCNEWS/ Abilio Da Cruz Quefi

Iha fatin hanesan, Reprezentante Ministériu Komérsiu no Indústria, Jorge Ferreira, esplika katak sorumutu ho Prezidente Autoridade neʼe hodi entrega área produsaun masin Maesmone neʼebé halaʼo ona kolleta primeiru iha loron 9 Outubru liubá. Entrega neʼe bazeia ba Memorandum of Understanding MOU neʼebé asina ona antes entre ministériu ho kompaña Lijuramoxdaily Unipesoal.Lda.

“Hektar 1 ba projetu pilotu hetan ona rezultadu diʼak, entaun ita entrega hektar 1 no aumezmu tempu hektares 9 neʼe entrega tomak ba kompaña atu bele halo jestaun kontinuasaun. Ida-neʼe sira bele emprega ita-nia traballador lokal sira,ˮ fó sai Jorge Ferreira.

MinistériuKomérsiu no Indústria hamutuk ho Autoridade RAEOA, ofisialmente entrega ona projetu indústria masin ho luan hektár sanulu iha Maesmone ba kompaña Lijuramoxdaily Unipesoal.Lda, hodi halaʼo jestaun kontinuasaun no ekspansaun ba produsaun masin nasionál. Foto OCNEWS/ Abilio Da Cruz Quefi

Jestór kompaña Lijuramoxdaily Unipesoal Lda, U. Amaral C. F. M. Da Silva, hateten katak nia parte orgullu tebes ho oportunidade boot neʼe hodi lori indústria Oe-Cusse nian ba oin. Nia afirma katak kompaña neʼe iha vizaun la hanesan ho kompaña sira seluk iha Timor-Leste.

“Ami nia kompaña investe osan boot atu hetan merkadu husi rai-liur, atu lori osan husi rai liur mai Timor,ˮ tuir U. Amaral C. F. M. Da Silva.

Kompaña halaʼo ona kontaktu ho rai barak hanesan Austrália, Amérika, Nova Zelándia, no Indonézia neʼebé presiza masin barak, hodi loke odamatan ba futuru indústria Oe-Cusse. Faze primeiru sei fó uluk servisu ba ema naʼin 20 ho prioridade boot ba Oe-Cusse oan, no produsaun rasik hahú kedas ohin uza investimentu inisiál hamutuk dollar $100.000 mill hodi taka nesesidade sira no asegura servisu kontinua laʼo maske iha tempu udan hodi kumpre planu esportasaun ba rai-liur.

 

Jornalista: Abilio Da Cruz Quefi

Editor: Abílio D’Santos

Komentar

Postingan populer dari blog ini

𝗦𝗮𝗹𝗮𝗿𝗶𝘂 𝗙𝘂𝗻𝘀𝗶𝗼𝗻𝗮𝗿𝗶𝘂 𝗥𝗔𝗘𝗢𝗔 𝗔𝘁𝗿𝗮𝘇𝘂, 𝗚𝗼𝘃𝗲𝗿𝗻𝘂 𝗦𝗲𝗻𝘁𝗿𝗮𝗹 𝗙𝗼 𝗢𝗽𝘀𝗮𝘂𝗻 𝗧𝗼𝗹𝘂

𝐑𝐞𝐤𝐫𝐮𝐭𝐚𝐦𝐞𝐧𝐭𝐮 𝐋𝐚 𝐁𝐚𝐳𝐞𝐢𝐚 𝐁𝐚 𝐍𝐞𝐬𝐞𝐬𝐢𝐝𝐚𝐝𝐞, 𝐅𝐮𝐧𝐬𝐢𝐨𝐧𝐚𝐫𝐢𝐮 𝟏 𝐌𝐢𝐥𝐥 𝐑𝐞𝐬𝐢𝐧 𝐈𝐡𝐚 𝐀𝐦𝐞𝐚𝐬𝐚 𝐋𝐚𝐤𝐨𝐧 𝐒𝐞𝐫𝐛𝐢𝐬𝐮

Halerik Husi Merkadu Numbei: Ukun La Ho Domin, Produtu La Folin