Foinsa'e Oe-Cusse Prepara-An Atende Turista Lokal, Nasionál no Internasionál
Oe-Cusse
Pante-Makasar, 12 Outubru 2026 (OCNEWS) – Foinsa'e na’in 20
iha Rejiaun Administrativa Espesiál Oe-Cusse Ambeno (RAEOA) partisipa iha
formasaun Mata Dalan Lokal Turístiku (Tour Guide), ne’ebé objetivu atu
haforsa koñesimentu no kapasidade rekursu umanu lokal iha área turizmu, inklui
preparasaun ba eventu internasionál CPLP sei hala’o iha tinan oin.
Formasaun
ne’e organiza husi Diresaun Turizmu RAEOA hamutuk ho formadór na'in rua husi
Dili Instutute of Technology Nasionál. Atividade ne’e hala’o durante loron tolu
iha Salaun Konvensaun 1 de Maiu Palaban, Aldeia Sanane, Suku Costa, Postu
Administrativu Pante-Makassar, RAEOA.
Partisipante
sira kompostu husi estudante DITKREO, ESTV-Palaban, SOLS Oe-Cusse, CFL, ELE no
membru grupu turizmu komunitária sira, ne’ebé hetan oportunidade atu aprende
kona-ba knaar no responsabilidade mata dalan turístiku, inklui oinsá fó
orientasaun no informasaun ba turista sira ne’ebé vizita Oe-Cusse.
Reprezentante
Prezidente Autoridade RAEOA, Sekretariu Rejional Planeamentu, Francisco Loka, enkoraja
ba joven sira atu aproveita oportunidade formasaun ne’e hodi hasa’e koñesimentu
kona-ba fatin turístiku, istória no kultura lokal.
Nia mós subliña
importánsia dezenvolve abilidade linguístika, atu bele komunika no atende
turista lokal, nasionál no internasionál ho di’ak.
Formadór
Helio Freitas esplika katak, durante loron tolu ne’e, partisipante sira aprende
matéria oioin, inklui fundamentu tour guide, étika profisionál,
koñesimentu kona-ba simu turizmu, jestaun viajen no prátika direta iha terenu.
Tuir nia,
mata dalan turístiku iha responsabilidade importante atu sai ponte entre fatin
turístiku no turista sira. Tanbá ne’e, profisionál sira iha área ne’e presiza
iha koñesimentu ne’ebé adekuadu, abilidade komunikasaun no kapasidade atu
esplika informasaun kona-ba patrimóniu lokal.
Nia mós
subliña katak, koñesimentu lian estranjeiru, liuliu Inglés no Português,
importante atu fasilita komunikasaun ho turista internasionál.
Iha fatin
hanesan, Tékniku Professional Jestaun Turizmu Estudu Peskija no Koperasaun,
Nicolau Salvador Marques, hateten katak formasaun ne’e mós iha objetivu atu
prepara rekursu umanu lokal ba eventu internasionál CPLP ne’ebé planeia atu
hala’o iha tinan oin.
Preparasaun
ne’e konsidera importante atu asegura katak vizitante sira bele hetan
orientasaun no informasaun kona-ba fatin turístiku iha RAEOA ho loos no klaru.
Liuhusi
formasaun ne’e, espera katak joven sira bele aumenta kapasidade iha área
turizmu, aproveita oportunidade servisu ne’ebé bele mosu, no kontribui ba
dinamizasaun ekonomia lokal.
Dezenvolvimentu
rekursu umanu lokal iha área turizmu mós bele sai parte importante hodi promove
patrimóniu istóriku, kulturál no atrasaun turístika Oe-Cusse ba vizitante lokal
nasionál no internasionál.
Reportagen:
OCNEWS


Komentar
Posting Komentar