Komisaun D PN, Fiskaliza Ezekusaun Orsamentu no Dezenvolvimentu iha RAEOA

Autoridade RAEO no Komisaun D Parlamentu Nasionál, Foto OCNEWS.

Oe-Cusse, 8 Outubru 2026 (OCNEWS) — Membru Parlamentu Nasionál, liuhusi Komisaun D, iha kinta-feira (8/10), realiza audénsia ho estrutura Autoridade Rejiaun Administrativa Espesiál Oe-Cusse Ambeno (RAEOA), atu diskute asuntu ekonomia no dezenvolvimentu, inklui fiskalizasaun ba ezekusaun Orsamentu Estadu no avaliasaun ba progresu dezenvolvimentu iha RAEOA.

Audénsia ne’e lidera husi Vise-Prezidente Komisaun D, Manuel Henrique Noronha, no hasoru malu ho Prezidente Autoridade RAEOA, Regio Servantes da Cruz Salu, hamutuk ho sekretáriu rejionál na'in tolu no diretór rejionál na'in rua nulu resin ida . Enkontru ne’e realiza iha Salaun Konvensaun 1 De Maiu, Palaban, Suku Costa, Postu Administrativu Pante Macassar.

Vise Prezidente Komisaun D Parlamentu Nasionál, Manuel Henrique Noronha. Foto OCNEWS.

Vise-Prezidente Komisaun D esplika katak, audénsia ne’e objetivu atu rona no analiza informasaun kona-ba área sira ne’ebé tama iha kompeténsia komisaun, liuliu rezultadu ezekusaun orsamentu no implementasaun programa dezenvolvimentu ne’ebé Autoridade RAEOA hala’o.

Depois audénsia, Komisaun D sei kontinua atividade fiskalizasaun iha terenu atu haree diretamente rezultadu programa produsaun ne’ebé estabelese husi Ministériu Komérsiu no Indústria. Programa ne’e sei hala’o lansamentu iha sexta-feira 9/10 iha Maesmone, Suku Taiboco, Postu Administrativu Pante Macassar.

Komisaun D mós sei vizita projetu irigasaun sira ne’ebé hetan alokasaun Orsamentu Estadu. Vizita ne’e atu avalia utilizasaun irigasaun, benefísiu ne’ebé komunidade hetan no impaktu projetu sira ba produsaun agríkola, liuliu iha área agrikultura ne’ebé depende ba bee-irigasaun.

Tuir reprezentante Komisaun D, avaliasaun ne’e importante atu hatene sistema irigasaun sira funsiona ho di’ak, se bee to’o ba to’os-na’in sira no infraestrutura ne’e fó apoiu sufisiente ba produsaun hare iha komunidade rurál.

Aleinde irigasaun, Komisaun D mós sei haree programa dezenvolvimentu agríkola no kriasaun animál, inklui hakiak fahi, manu no karau ne'ebe mak atu fornese susubeen.

Komisaun D konsidera katak vizita direta ba programa sira ne’e importante atu avalia implementasaun, rezultadu no sustentabilidade programa sira ba futuru. Avaliasaun ne’e mós atu identifika progresu no dezafiu sira ne’ebé Autoridade RAEOA enfrenta iha prosesu implementasaun programa dezenvolvimentu.

Iha parte ikus, Komisaun D fó apelu ba Autoridade RAEOA atu kontinua hametin esforsu dezenvolvimentu iha Oe-Cusse, hodi asegura katak benefísiu husi programa governu bele to’o ba komunidade.

Komisaun D mós apresia kolaborasaun entre Autoridade RAEOA no komunidade, ne’ebé konsidera nu’udar elementu importante ba progresu dezenvolvimentu iha rejiaun ne’e.

Maski iha dezafiu hanesan falta bee, Komisaun D haree katak iha mudansa pozitivu balu iha Oe-Cusse. Tanbá ne’e, husu ba autoridade no komunidade atu kontinua servisu hamutuk hodi promove dezenvolvimentu sustentável no asegura katak povu Oe-Cusse bele sente benefísiu husi estatutu administrativu espesiál ne’ebé rejiaun ne’e iha.

Reportagen: OCNEWS

Komentar

Postingan populer dari blog ini

𝗦𝗮𝗹𝗮𝗿𝗶𝘂 𝗙𝘂𝗻𝘀𝗶𝗼𝗻𝗮𝗿𝗶𝘂 𝗥𝗔𝗘𝗢𝗔 𝗔𝘁𝗿𝗮𝘇𝘂, 𝗚𝗼𝘃𝗲𝗿𝗻𝘂 𝗦𝗲𝗻𝘁𝗿𝗮𝗹 𝗙𝗼 𝗢𝗽𝘀𝗮𝘂𝗻 𝗧𝗼𝗹𝘂

𝐑𝐞𝐤𝐫𝐮𝐭𝐚𝐦𝐞𝐧𝐭𝐮 𝐋𝐚 𝐁𝐚𝐳𝐞𝐢𝐚 𝐁𝐚 𝐍𝐞𝐬𝐞𝐬𝐢𝐝𝐚𝐝𝐞, 𝐅𝐮𝐧𝐬𝐢𝐨𝐧𝐚𝐫𝐢𝐮 𝟏 𝐌𝐢𝐥𝐥 𝐑𝐞𝐬𝐢𝐧 𝐈𝐡𝐚 𝐀𝐦𝐞𝐚𝐬𝐚 𝐋𝐚𝐤𝐨𝐧 𝐒𝐞𝐫𝐛𝐢𝐬𝐮

Halerik Husi Merkadu Numbei: Ukun La Ho Domin, Produtu La Folin