Tinan Rua Aeroportu Rota do Sândalo La Funsiona, PN Husu PA RAEOA Funsiona Fali

Membru Parlamentu Nasionál Komisaun D Ne’ebé Trata Tsuntu Ekonómia No Dezenvolvimentu Halo Audensia Ho Autoridade RAEOA, Foto OCNEWS

Oe-Cusse, 8 Outubru 2026 (OCNEWS) — Membru Parlamentu Nasionál (PN) iha Kinta-Feira ne'e, liuhusi Komisaun D ne’ebé trata asuntu ekonómia no dezenvolvimentu, rekomenda ba Autoridade Rejiaun Administrativa Espesiál Oe-Cusse Ambeno (RAEOA) atu garante funsionamentu no sustentabilidade Aeroportu Rota do Sândalo, ne’ebé durante tinan rua ona la funsiona ho di’ak.

Vise-Prezidente Komisaun D, Manuel Hendrique Noronha, hato’o rekomendasaun ne’e durante audiénsia públika ho Autoridade RAEOA, atu konfirma ezekusaun Orsamentu Jerál Estadu (OJE) 2026 iha Oe-Cusse, sexta-feira.

Manuel Noronha hateten katak, maski iha aeroportu iha Dili, Suai no munisípiu seluk, Aeroportu Rota do Sândalo iha infraestrutura no padraun ne’ebé konsidera di’ak. Tanbá ne’e, nia husu ba Autoridade RAEOA atu haforsa kordenasaun ho entidade relevante sira, hodi garante katak aeroportu ne’e bele kontinua funsiona.

“Ita haree katak vizitante menus. Ita rekomenda ba Autoridade RAEOA atu halo kordenasaun no ligasaun ho entidade sira ne’ebé bele kontribui ba funsionamentu aeroportu ne’e. Tanbá aeroportu Oe-Cusse nia infraestrutura di’ak tuir padraun, ita husu ba Autoridade RAEOA atu garante nia sustentabilidade no promove koperasaun di’ak ho entidade hotu, nune’e aeroportu bele kontinua funsiona,” nia hateten iha Salaun Konvensaun 1 de Maiu Palaban.

Iha audiénsia públika ne’ebé hanesan, deputada Virginia Ana Belo, husi bankada FRETILIN, mós husu ba Autoridade RAEOA atu enkaisa funsionamentu aeroportu ne’e iha Planu Asaun Anuál, hodi bele uza infraestrutura ne’e atu kontribui ba aumentu reseita Estadu.

Nia konsidera katak, aeroportu ne’ebé harii ho gastu osan Estadu ne’ebé boot tenke iha utilizasaun ne’ebé efetiva, la’ós husik de’it laiha atividade.

“Ha’u husu ba Autoridade atu tau asuntu ne’e iha planu prioridade, hodi garante funsionamentu kontinua. Ha’u dezafia Autoridade atu halo mudansa, tanbá aeroportu ida-ne’e tuir padraun, maibé se husik de’it hanesan ne’e, oinsá mak ita bele hetan reseita? Governu gasta ona osan barak, entaun infraestrutura ne’e tenke uza,” nia rekomenda.

Iha parte seluk, Prezidente Autoridade RAEOA, Régio da Cruz Salu, rekoñese katak aeroportu ne’e iha fasilidade ne’ebé di’ak no Estadu gasta ona osan barak atu dezenvolve infraestrutura ne’e. Maibé, nia lamenta no triste tanbá aeroportu seidauk utiliza ho efetivu atu kontribui ba reseita Estadu.

Kona-ba aviaun ki’ik ne’ebé antes liga ho ZEESM, Régio da Cruz Salu esplika katak Autoridade RAEOA halo ona esforsu atu hetan dokumentu orijinál sira, ne’ebé balu hetan ona. Maski nune’e, asuntu ne’e seidauk rezolve hotu tanbá iha parte ida ne’ebé sei tama hela iha prosesu investigasaun legál.

Nia hatutan katak, aviaun ne’e no infraestrutura aeroportu tenke utiliza atu apoia atividade ekonómika. Tanbá ne’e, Autoridade RAEOA sei halo enkontru ho ekipa aeroportu atu buka opsaun hodi bele hahú utiliza aeroportu ne’e lalais.

Nia mós informa katak, iha tinan oin, bainaka internasionál barak sei partisipa iha kongresu internasionál ne’ebé sei realiza iha Oe-Cusse. Tanbá ne’e, esforsu atu asegura funsionamentu aeroportu sai importante.

Maski nune’e, asuntu kona-ba sertifikasaun Aeroportu Rota do Sândalo kontinua sai dezafiu. Tuir deklarasaun ne’ebé hato’o, responsabilidade kona-ba sertifikasaun ne’e iha Governu sentrál, no Autoridade RAEOA presiza kontinua haforsa kordenasaun ho entidade relevante sira atu buka dalan ba prosesu sertifikasaun.

Ba komunidade Oe-Cusse, funsionamentu aeroportu ne’e importante atu apoia mobilidade, turizmu no atividade ekonómika. Tanbá ne’e, garantia kona-ba sustentabilidade, sertifikasaun no utilizasaun efetiva infraestrutura ne’e presiza sai prioridade ba entidade kompetente sira.

Reportagen: OCNEWS

Komentar

Postingan populer dari blog ini

𝗦𝗮𝗹𝗮𝗿𝗶𝘂 𝗙𝘂𝗻𝘀𝗶𝗼𝗻𝗮𝗿𝗶𝘂 𝗥𝗔𝗘𝗢𝗔 𝗔𝘁𝗿𝗮𝘇𝘂, 𝗚𝗼𝘃𝗲𝗿𝗻𝘂 𝗦𝗲𝗻𝘁𝗿𝗮𝗹 𝗙𝗼 𝗢𝗽𝘀𝗮𝘂𝗻 𝗧𝗼𝗹𝘂

𝐑𝐞𝐤𝐫𝐮𝐭𝐚𝐦𝐞𝐧𝐭𝐮 𝐋𝐚 𝐁𝐚𝐳𝐞𝐢𝐚 𝐁𝐚 𝐍𝐞𝐬𝐞𝐬𝐢𝐝𝐚𝐝𝐞, 𝐅𝐮𝐧𝐬𝐢𝐨𝐧𝐚𝐫𝐢𝐮 𝟏 𝐌𝐢𝐥𝐥 𝐑𝐞𝐬𝐢𝐧 𝐈𝐡𝐚 𝐀𝐦𝐞𝐚𝐬𝐚 𝐋𝐚𝐤𝐨𝐧 𝐒𝐞𝐫𝐛𝐢𝐬𝐮

Halerik Husi Merkadu Numbei: Ukun La Ho Domin, Produtu La Folin