Servi Populasaun 29 Mil, Sentru Saúde Kiumaonteko Simu Karreta Operasionál
Oe-Kusi, 23 Outubru 2026 (OCNEWS)-Autoridade Rejiaun Administrativa Espesiál Oe-kusi Ambeno (RAEOA), liuhosi Diresaun Servisu Saúde Rejionál, entrega karreta operasionál ida ba Sentru Saúde Kiumaonteko, neʼebé lokaliza iha aldeia Sanane, Suku Costa, Sub-rejiaun Pante-Makasar, iha Sesta (23/10). Atribuisaun transporte neʼe sai nuʼudar solusaun urjente hodi apoiu pesoal saúde sira lori serbisu atendimentu ba komunidade, liuliu ba área rurál no izoladu sira neʼebé durante neʼe susar atu kobre tanba falta transporte.
Xefe Sentru Saúde Kiumaonteko, Anita Maria da Cunha Lic.Sp, hatete katak veíkulu operasionál ne’ebé simu neʼe sei apoiu tebes serbisu sira iha komunidade, hanesan atividade SISCA, PIS, Sweeping, Vasina, no Vizita Domisiliáriu.
“Husi karreta neʼe nia prezensa, ami sei esforsu hodi atinji servisu neʼebé durante tinan barak la konsege kobre, no sei esforsu hodi bele lori saúde neʼe toʼo iha komunidade liu-liu sira neʼebé hela iha area rural,” dehan Anita Maria da Cunha.
Nia esplika katak, antes neʼe Sentru Saúde Kiumaonteko utiliza deʼit karreta multifunsaun ka Ambulánsia neʼebé tuir loloos atende deʼit servisu emerjénsia nian tanba neʼe mak la konsege atinji serbisu balun.
Maibé agora diʼak ona tanba ohin iha ona karreta ida hodi apoiu pesoal saúde sira atu bele mellora liután serbisu hodi kobre suku 6 no aldeia 14 ho fasil. Sentru saúde neʼe kobre mós suku sira neʼebé ho distánsia dook tebes hanesan Suku Mone-Meco-Kutete no Suku Nipani.
Nia mós hatoʼo agradesimentu waʼin ba diresaun Saúde Rejionál no kompromete sei uza deʼit veíkulu neʼe ba servisu saúde, kuidadu hanesan propriedade rasik, no halo manutensaun tuir tempu. Atualmente, sentru saúde refere iha pesoal saúde hamutuk naʼin 35, no se hamutuk ho postu saúde FTS sira, totál hamutuk naʼin 66.
Iha biban neʼe, Diretora Servisu Rejionál Saúde Oe-kusi, Odete Amado Martins akresenta katak, karreta operasionál neʼe hodi suporta atividade iha dadus primária nian. desizaun neʼe foti tanba haree ba sentru saúde neʼe nia área kobertura luan ho populasaun barak liu iha sentru saude sira hotu iha Oe-kusi, neʼebé hamutuk kuaze ema naʼin 29 mil.
“Odete esklarese katak, husi sentru saúde 5 iha Oe-kusi, sentru saúde 4 mak iha hotu ona karreta operasionál, no Sentru Saúde Kiumaonteko mak seidauk iha. Tanba neʼe mak ita ho hanoin katak kada sentru saúde presiza iha karreta operasionál hodi apoiu atividade neʼebé planeia ona iha tinan ida nia laran, ho ida-neʼe maka diresaun foti desizaun hodi distribui transporte, nuneʼe xefe sentru sira bele jere rasik ba atendimentu iha bazeˮ.
Diretora neʼe taka hodi fó hanoin deʼit katak, transporte ne’e presiza jere ho responsabilidade boot hodi uza bazeia ba regra no nesesidade serbisu nian.
Nia haktuir katak propriedade estadu nian tenke asegura hodi uza ba tempu naruk, no husu partikulár ba motorista sira atu konduz ho kuidadu no kumpri regra sira hodi nuneʼe bele fasilita nafatin serbisu hotu ba atendimentu komunidade iha baze.
Reportagen: OCNEWS



Komentar
Posting Komentar