Prezidente RAEOA Prepara Medida ba Rezolve Projetu Abandonadu husi Lideransa Anterior
Oe-Cusse-Pante
Macassar, 28 Outubru 2026 (OCNEWS) – Prezidente Autoridade Rejiaun
Administrativa Espesiál Oe-Cusse Ambeno (RAEOA), Régio Servantes Roméia da Cruz
Salu, afirma katak sei foti medida atu kontinua no remata projetu
dezenvolvimentu sira ne'ebé seidauk kompletu husi períodu lideransa anterior,
hodi evita investimentu osan Estadu lakon no asegura projetu públiku sira bele
hetan kontinuidade.
Iha
deklarasaun ba jornalista sira, Régio temi projetu Jardín Edifísiu
Administrasaun nu'udar ezemplu ida husi obra ne'ebé seidauk remata, maski agora
dadaun projetu ne'e tama ona iha faze final.
Atu garante
kontinuidade ba prosesu konstrusaun, Autoridade RAEOA hahú ona buka solusaun
téknika no administrativu. Iha semana kotuk, Ajénsia Dezenvolvimentu Nasionál
(ADN) haruka ona empreza SAMHEE Construction Co. Ltd. atu prepara no aprezenta Bill
of Quantities (BoQ) foun, ka lista kuantidade no kalkulasaun kustu projetu,
iha semana ne'e.
Prezidente
RAEOA konsidera katak prosesu ne'e importante atu rezolve kestaun projetu
pendente sira molok diskusaun kona-ba Orsamentu Jerál Estadu (OJE). Nia hakarak
asegura katak problema administrativu sira ne'ebé bele rezolve lalais nune'e labele kontinua hela sein solusaun.
Régio mós
fó avizu katak, se empreza responsavel la kumpre pedidu atu aprezenta dokumentu
foun, nia sei foti medida liuhusi karta ofisiál.
“Se empreza
sira seidauk aprezenta dokumentu foun ne'e, nia sei hasai karta ofisiál ida
hodi foti fali providénsia,” hateten Prezidente RAEOA.
Nia esplika
tan katak mudansa iha sistema governasaun presiza atu garante projetu públiku
sira labele abandona fila-fali bainhira iha mudansa lideransa. Ho sistema
ne'ebé organiza di'ak, lideransa tuirmai bele kontinua servisu dezenvolvimentu
tuir programa foun, la presiza enfrenta problema projetu antigu sira ne'ebé
seidauk rezolve.
Aleinde
asuntu projetu abandonadu, Prezidente RAEOA mós hatudu potensia ekonomia ne'ebé
rejiaun iha liuhusi utilizasaun espasu públiku. Tuir nia, espasu públiku barak
iha RAEOA bele hetan utilizasaun liuhusi sistema arrendamentu, atu nune'e bele
kontribui ba aumentu reseita ba kofre Estadu.
Jornalista:
Abilio da Cruz Quefi
Editor:
Abílio D’Santos

Komentar
Posting Komentar