Xefi Suku Beneufe Husu Aselera Estrada no Drenajen Molok Tempu Udan
Oe-Cusse,
15 Outubru 2026 (OCNEWS) – Xefe Suku Beneufe, Postu Administrativu Nitibe, Marcos
Meni Sila husu ba kompaña sira ne'ebé hala'o serbisu infraestrutura iha Suku
Beneufe atu aselera serbisu estrada molok tempu udan hahú. Nia preokupa katak
udan boot bele estraga estrada no hamosu difikuldade ba movimentu komunidade
nian, liuliu bainhira mota sira nakonu.
Marcos Meni
Sila husu ba kompaña sira atu aproveita tempu ne'ebé sei favorável atu kontinua
serbisu infraestrutura ne'ebé seidauk remata. Nia mós husu ba Diretór Rejionál
Obras Públikas atu tau atensaun ba progresu serbisu estrada iha Suku Beneufe no
halo akompañamentu ba kompaña sira ne'ebé responsavel ba implementasaun
projetu.
Marcos Meni
Sila hateten katak, to'o agora movimentu komunidade nian sei lao di'ak tanbá
tempu udan seidauk hahú. Maibé, bainhira udan boot no mota sira nakonu,
komunidade sira hasoru difikuldade atu hakat mota, liuliu iha fatin ne'ebé
laiha ponte.
Nia relata
katak, iha situasaun urjente bainhira komunidade presiza ba Oe-Cusse vila
durante tempu udan, dala ruma sira tenke selu ema atu ajuda sira hakat mota.
Kustu ba ajuda ne'e entre US$ 5.00 to'o US$ 20.00
Kondisaun
ne'e mak sai parte ida husi preokupasaun kona-ba movimentu komunidade nian
durante tempu udan. Tanbá ne'e, Marcos Meni Sila husu atu serbisu
infraestrutura iha Suku Beneufe aselera molok tempu udan hahú.
Aleinde
husu atu aselera serbisu estrada, Marcos Meni Sila mós husu ba Prezidente
Autoridade Rejionál Espesiál Oe-Cusse Ambeno (RAEOA) atu konsidera medida
preventiva ba estrada ne'ebé ateru ona. Atu tau fui sementi ka corang iha parte
estrada ne'ebé ateru, hodi ajuda hamenus risku estragu durante tempu udan.
Nia mós
husu atu tau bee-dalan iha área estrada ne'ebé presiza, hodi fasilita bee udan
nia dalan no hamenus risku estragu ba estrada bainhira udan boot hahú. Nia husu
ba autoridade no kompaña sira atu tau atensaun ba medida preventiva sira-ne'e
durante implementasaun projetu infraestrutura.
Aleinde
ne'e, Marcos Meni Sila husu ba kompaña sira atu rega estrada ho bee durante
atividade konstrusaun, hodi hamenus rai-rahun ne'ebé mosu durante serbisu. Tuir
nia, rai-rahun bele afeta saúde komunidade nian, liuliu ba ema sira ne'ebé hela
besik área konstrusaun no dalan ninin.
Nia hein
katak, liuhusi atensaun husi autoridade relevante no kompaña sira, serbisu
estrada bele avansa molok tempu udan hahú no risku estragu ba estrada bele
hamenus.
Jornalista: OCNEWS

Komentar
Posting Komentar