SRE RAEOA Halo Abertura Ezame Nasionál 2026, Vincêncio Cono Husu Estudante Sira Hatudu Kapasidade Masímu
Oé-Cusse, 19
Outubru 2026 (OCNEWS) – Diretór Servisu Rejionál Edukasaun (SRE) Rejiaun
Administrativa Espesiál Oé-Cusse Ambeno (RAEOA), Vincêncio Cono, halo abertura
ofisiál ba Ezame Nasionál no Lokál Tinan Akademiku 2026 ba estudante sira iha nível
Ensinu Báziku 3.º Siklu, Ensinu Sekundáriu Jerál (ESG) no Ensinu Sekundáriu
Tékniku-Vokasionál (ESTV) iha territóriu RAEOA tomak.
Serimónia
abertura ne'e akompaña husi dirijente eskola sira, manorin ne'ebé servisu
nu'udar vijilante ezame nian no autoridade edukasaun rejionál sira, hodi
hamutuk garante prosesu ezame ne'e la'o tuir prosedimentu ne'ebé estabelese.
Iha
serimónia ne'e, Diretór SRE RAEOA, Vincêncio Cono, hatete katak abertura ne'e
marka inísiu husi prosesu avaliasaun finál ba estudante sira, ne'ebé reflete
preparasaun no aprendizajen durante tinan tolu nia laran.
“Ohin
eskola sira iha territóriu RAEOA realiza ona Ezame Nasionál ba Tinan Akademiku
2026 tuir kalendáriu Ministériu Edukasaun. Tanbá ne'e mak ita mai diretamente
ba eskola sira atu halo abertura ofisiál ba prosesu sériu ne'e,” dehan
Vincêncio Cono.
Nia husu
estudante sira atu hatudu sira-nia kapasidade akadémika no halo esforsu máximu
durante prosesu ezame ne'e, tanbá rezultadu ezame bele iha influénsia ba
sira-nia kontinuidade estudu no futuru akadémiku.
“Iha
realizasaun Ezame Nasionál Tinan 2026 ne'e, ha'u hein katak estudante sira sei
hatudu rezultadu ne'ebé di'ak. Ezame ne'e asuntu sériu, tanbá preparasaun
durante tinan tolu sei avalia iha períodu loron tolu, ne'ebé importante ba
futuru akadémiku alin sira nian,” nia hatete.
Diretór SRE
RAEOA ne'e mós fó orientasaun ba dirijente eskola no manorin vijilante sira atu
mantein prezensa no fó apoiu nesesáriu iha sentru ezame hotu durante períodu
realizasaun ezame nian.
Nia
enfatiza katak manorin sira iha papél importante atu garante prosesu Ezame
Nasionál no Ezame Lokál la'o ho hakmatek, transparénsia no tuir rigor
prosedimentu edukasaun nian.
“Garante
katak ezame ne'e la'o ho di'ak hodi nakloke servisu obrigatóriu integradu
ne'ebé sistemátiku iha dezenvolvimentu setór edukasaun tomak, liuliu iha
Oé-Cusse Ambeno,” nia subliña.
Tuir dadus
SRE RAEOA nian, estudante hamutuk 3.027 mak partisipa iha Ezame Nasionál no
Lokál Tinan 2026 iha territóriu RAEOA. Númeru ne'e kompostu husi estudante
Ensinu Báziku 3.º Siklu hamutuk 1.604, Ensinu Sekundáriu Jerál hamutuk 1.051 no
Ensinu Sekundáriu Tékniku-Vokasionál hamutuk 372.
Iha nivel
eskola, Ensinu Sekundáriu Jerál Filiál Tranzitóriu Leobeno, Oe-Silo, rejista
estudante hamutuk 58, kompostu husi estudante na'in 26 iha área Siénsia no
Téknolojia no na'in 32 iha área Siénsia Sosiál. Husi total ne'e, estudante
na'in ida la partisipa iha ezame.
Enkuantu
iha Ensinu Báziku Sentral 3.º Siklu Oe-Silo, estudante hamutuk 61 mak tuir
ezame, kompostu husi estudante mane na'in 25 no estudante feto na'in 36. Maski
nune'e, estudante na'in tolu la marka prezensa iha ezame.
SRE RAEOA
hein katak realizasaun Ezame Nasionál no Lokál Tinan 2026 sei kontribui ba
avaliasaun kualidade aprendizajen no dezenvolvimentu setór edukasaun iha
Rejiaun Administrativa Espesiál Oé-Cusse Ambeno.
Reportagen: OC News


Komentar
Posting Komentar