Governu RAEOA ho CNR Entrega Ekipamentu ba Ema ho Defisiénsia
Inan Carolina Bobi hamutuk ho nia oan ho kondisaun defisiénsia fízika uza kadeira roda, akompaña husi familia. Imajen ne'e hatudu momentu akompañamentu no apoiu ba labarik ho defisiénsia fízika, nu'udar parte husi esforsu atu promove inkluzaun no dignidade ba ema ho defisiénsia iha Oe-Cusse. Foto OCNEWS/ Abilio da Cruz Quefi.
Oe-Cusse-Pante
Macassar, 30 Outubru 2026 (OCNEWS) – Governu, liuhusi Autoridade Rejiaun
Administrativa Espesiál Oe-Cusse Ambeno (RAEOA), hamutuk ho Sentru Nasionál
Reabilitasaun (CNR) no Diresaun Asaun Sosiál, entrega ona apoiu fasilidade ba
Ema ho Defisiénsia (EHD) iha Oe-Cusse.
Apoiu
sosiál ne'ebé entrega kompostu husi kadeira roda unidade 17, ai-tonka,
triisiklu ida no kama espesiál (siti card) ida, ho objetivu atu
dignifika no hakbiit sidadaun sira ne'ebé moris ho kondisaun defisiénsia iha
rejiaun ne'e.
Apoiu
fasilidade hirak-ne'e entrega simbolikamente husi Prezidente Autoridade RAEOA,
Regio da Cruz Salu, ba Ema ho Defisiénsia na'in tolu, ne'ebé kompostu husi inan
ida no labarik na'in rua, iha Edifísiu Gabinete Prezidente Autoridade RAEOA.
Prezidente Autoridade Rejiaun Administrativa Espesial Oe-Cusse Ambeno, Regio da Cruz Salu, iha ambitu entrega apoiu ekipamentu ba ema ho defisiénsia fízika. Foto OCNEWS/ Abilio da Cruz Quefi.
Prezidente
Autoridade, Regio da Cruz Salu, hato'o agradeseimentu kle'an ba Ministériu
Solidariedade Sosiál no Inkluzaun (MSSI), ne'ebé hatudu ona kompromisu boot
liuhusi vizita no koordenasaun regulár.
Nia hateten
katak kooperasaun ho CNR ne'e urjente tebes, hodi bele fó resposta sosiál
ne'ebé adekuadu ba povu no família sira ne'ebé responsavel ba labarik ka membru
família ho defisiénsia fízika.
“Hanesan
ohin ita hotu haree, inan balun sira-nia oan ne'ebé moris no halo ona tinan ba
12, maibé sei iha estadu defisiénsia fízika. Dalabarak ita la haree katak,
afinal ita-nia povu moris iha situasaun ida ne'ebé ita labele deskreve ho
kualker estatmentu ba dezenvolvimentu,” dehan Regio da Cruz Salu.
Tuir dadus
ofisiál, totál Ema ho Defisiénsia iha Oe-Cusse hamutuk na'in 692. Prezidente
Autoridade ne'e rekoñese katak situasaun ne'ebé inan-aman, membru família no
labarik sira enfrenta iha baze loloos susar tebes atu sukat.
Tan ne'e,
nia fó mós apresiasaun aas ba Diresaun Rejionál Asaun Sosiál, ne'ebé sai
nu'udar instituisaun própriu rejionál atu haree ba asuntu ne'e.
“Tanbá ne'e
mak tinan-tinan iha Orsamentu Jeral Estadu (OJE), ita tau nafatin kompromisu
orsamentál komplementár saida mak ministériu ninian mai ita liuhusi Sentru
Solidariedade Sosiál ninian. Ida-ne'e mak servisu ida ne'ebé ita espera fó
valor atu dignifika povu ne'ebé moris ho situasaun sira hanesan ne'e,” nia
hatete.
Iha biban
ne'e, Regio da Cruz Salu mós fó sai katak RAEOA iha ona planu ba tinan oin hodi
harii Sentru Reabilitasaun, inklui eskritóriu promosaun ba apoiu EHD. Dezeñu ba
projetu ne'e aprova ona no orsamentu mós iha ona, no tinan oin sei ezekuta.
“Ba
inan-aman no família sira, primeiru labele izola informasaun kona-ba membru
família ruma ne'ebé iha hela situasaun hanesan ne'e. Defisiénsia matan, fíziku
no defisiénsia seluk tan, tenke mai hatete ba instituisaun própriu governu
nian. Ha'u husu ba sosiedade Oe-Cusse tomak, liuliu intelektuál sira, ita tenke
ho fuan soe netik buat ruma ba ema kbiit-laek sira,” nia apela.
Iha fatin
hanesan, Xefe Departamentu Protesaun Sosiál iha Sentru Solidariedade Sosiál no
Inkluzaun RAEOA, David Casenube, konfirma katak intervensaun sosiál ne'e halo
ho objetivu atu hakman kargu sosiál ne'ebé família sira enfrenta.
Xefe Departamentu Protesaun Sosiál iha Sentru Solidariedade Sosiál no Inkluzaun RAEOA, David Casenube. Foto OCNEWS/ Abilio da Cruz Quefi.
“Ohin ita
ho Prezidente Autoridade, entrega ona apoiu ho modu simbóliku ba família na'in
3 hodi sira bele utiliza fasilidade sira ne'e,” nia hatete.
Reprezentante
benefisiáriu sira, Maria Ausiliadora Maryuni no Carolina Bobi, hato'o sira-nia
agradeseimentu boot ba governu no lideransa sira, tanbá liuhusi kadeira roda no
ekipamentu sira ne'e, bele lori esperansa foun no fasilita movimentu ba
sira-nia oan ne'ebé sofre moras defisiénsia fízika durante tinan barak ona.
Benefisiáriu familia ema defisiénsia fízika Maria Ausiliadora Maryuni. Foto OCNEWS/ Abilio da Cruz Quefi.
“Ha'u
hato'o obrigadu barak ba governu ne'ebé mak oferese ona apoiu ba ami-nia oan
ne'ebé mak sofre hela moras defisiénsia fízika,” dehan Maria Ausiliadora
Maryuni.
Jornalista:
Abilio da Cruz Quefi
Editor: Abílio D’Santos




Komentar
Posting Komentar